爽報 (財經V27, 2012.11.05)

 

記憶中，政府好似曾經話過，要發展醫療旅行。最近一次經歷話畀我知，香港天殘地缺，冇可能搞醫療旅行。星期日，天水圍開完研討會，有位遠道而來嘅印度朋友，《華爾街日報》客席評論員Barun，問邊度可以搵間診所打針？原來呢位朋友，出發來香港開會之前，剛剛被鄰居隻狗咬。隻狗，打咗瘋狗針，應該冇事。

不過，印度嘅醫生話：「Better be safe than sorry」所以，最終都要佢打針，仲要係一個療程，分3個月，打7支針。其中一針，就係要星期日打。

Barun連針藥同醫生信都帶埋來開會，以為香港求其搵間診所搞，易過借火。天水圍，原來星期日下晝搵醫生，非常困難。佢問：「唔通星期日冇人病？」我話：「醫生都要放假嘛。再講，香港診所，傷風感冒肚痛，開必利痛消炎抗生素，最緊要係醫生紙。打瘋狗症針，我真係唔知啲醫生肯唔肯。

 

冇競爭　收費貴

「公立醫院呢？香港唔係好似英國NHS，人哋做呢啲嘢，好爽手。」Barun問。我為咗唔好浪費急症室資源（因為唔係急症嘛），就同佢哋去咗一間新界西嘅私家醫院。由天水圍去嗰度，搞咗半粒鐘。去到門診，同登記姐姐講解咗10分鐘，走來走去，結果，呢間醫院唔肯收呢個症。

又搞半粒鐘，終於去咗沙田一間私家醫院。可能較有心機經營，不過登記之後，要等多半粒鐘。終於，打咗支自己帶嘅針，盛惠560元。Barun話：「收費足足係新德里嘅一倍有多喎。」

「時間都用多一倍囉！」我話。「我以為香港嘅服務業好優良？針藥都係我帶喎！」Barun問。

「香港好多行業，收費貴，因為冇競爭。所以，政府話要搞醫療旅遊，真係諗多咗。講到尾，以前係英聯邦嘅執業醫生，都可以來香港執業。不過，?家基本上除咗香港兩間醫學院嘅畢業生，基本上都唔使旨意執業。」我話。

「香港幾時變得咁封閉㗎？」Barun問。回歸後囉！唔止醫療、法律、會計同好多專業都係咁。你話香港仲有冇競爭力？

 

李兆富