蘋果日報 (財經要聞B11, 2012.11.06)

 

上周三，全港報章都報道東隧加價仲裁失敗。咁啱，嗰晚我去咗個得一個人dress up嘅萬聖節派對，識到個喺港通控股（032）做嘢嘅人。

港通以前係紅隧嘅經營者，E家亦揸住三成五大老山隧道，同五成西隧。我問佢對東隧加價失敗、特別係對過海塞車點睇。佢好簡單話：「冇㗎啦，合約寫明仲裁決定後冇得上訴，等2016年政府收番東隧先算。」

西隧有望賺鋪勁

紅隧日日塞，使用者用時間作代價。東隧唔畀加價，都解決唔到問題，而政府都開始話紅隧加價指日可待。紅隧如果加價，理論上都已令港通揸五成嘅西隧，因車流向西受惠。不過西隧可得益更多，因為政府可令西隧減價。

點減？日日讀馬克思嘅飯民，淨係識話回購隧道，因為佢哋淨係識呢招，令社會承擔減價的損失。不過政府已開先河，用財技都能令社會有承擔。

巴士收費，老人每程只收兩蚊，係政府現兜兜補差價。所以西隧可加價到法定上限，令紅隧更塞，之後我哋嘅強勢政府一定慷納稅人之慨平息風波，每輛每次補貼。

例如，私家車現法定上限可收150蚊，西隧加到150蚊後，政府只要每架補貼130蚊，就可令西隧同紅隧同價。就算車流唔增加，亦可多收三倍。西隧就可賺鋪勁！港通股價自然飆升。

西隧對港通嘅貢獻有幾大？舊年西隧貢獻2.7億元，而港通自己只賺2.3億元。港通派息每年三毫，金融海嘯都係咁。

唯一缺陷係佢哋投資會輸錢，如果將所有利益派畀股東，咁隻嘢就會大升特升。作為一個深信真正自由嘅市場先可為人民帶福利，下一句真係令我沮喪，不過都係要講：「香港補貼股時代揭幕！」

 

孫柏文

獨立股評人

http://facebook.com/shuen

本欄逢周二刊出