爽報 (財經V34, 2012.11.06)

 

稅，有兩個意義。一，政府收入。二，影響市民選擇嘅政策工具。

小政府，政府收入，就應盡量限制；開支，亦唔好大。量入為出原則，基本法都有寫。簡單稅制低稅率，本來係香港優勢。好多人膚淺地以為，簡單稅制低稅率係為吸引貪小便宜嘅企業。錯！實情係，只有規模合適而又高效嘅政府，先至可以維持簡單稅制低稅率。

至於用扭曲稅去做影響市民選擇嘅政策工具，就任何時候都唔應該做。扭曲稅，可增加消費者嘅代價，唔代表可減低主觀意欲，結果制度逃稅誘因亦都非常之大。例子之一，就係煙稅；每次加煙稅，走私煙犯法活動即時暴增。例子之二，就係最新簡稱BSD嘅非本地居民買家印花稅；政策出台唔夠兩日，就有人提出用公司轉讓避稅。

避稅係唔正常嘅市場交易。冇扭曲稅嘅情況下，就唔會有呢類唔正常嘅市場交易。唔正常嘅市場交易，最大問題就係交易雙方都更冇保障。又以用公司轉讓避BSD做例子，買家可能會揹上意想不到嘅債務同責任。呢一點就連政府都唔可以否定。

 

加快批樓花以應急

不認不認，政府就惟有出口術。香港乃法治之區，政府就反其道而行，帶頭鼓勵犯罪，真係唔知算係乜嘢管治之道。違反自由市場原則，最大問題係將遊戲規則扭曲，破壞營商環境，意思亦唔係話做生意嘅賺少咗咁簡單。

聯繫滙率嘅代價，唔可以當唔存在。最令人氣頂，係金管局可一直堅持指鹿為馬，話聯滙同資產泡沫冇關係。香港樓價貴，租金有上升壓力，講到尾，都係因港紙被美元拖落水。郁聯滙係大手術，政府當然唔會輕舉妄動。

增加住宅供應，唔可能即時做得到。住宅價格上升，如果由所謂嘅剛性需求帶動，SSD同BSD都唔可能有效。

不過，如果唔係有所謂嘅剛性需求，增加長遠供應，不但唔會有效，而且會好長手尾。

滿足短期購買力，最快增加供應嘅方法，其實應該加快批樓花。不過，呢個政府少少常識都冇，講都嘥氣。

 

李兆富