爽報 (財經V42, 2012.11.15)

彭博報道，英國地產，主要買家都係外國人；600萬鎊以上嘅豪宅，外國人買家數目，多過本地人。前宗主國所做嘅，我哋就反其道而行。

彭博話，原因係弱英鎊令到資產變得吸引。數字上，歐洲諸國當中，英國經濟指標，算係標青。

英倫銀行，係其中一個冇底線做量化寬鬆嘅國家。先旨聲明，我並唔係贊成量化寬鬆。通脹對窮人有幾大傷害，唔使我多講。英國情況都一樣。不過，人家至少未至於將問題歸咎外人買起資產，亦都明白到，如果有資產泡沫，就寧願畀外國人買。大家都知道，泡沫爆破，多少少外國資金頂吓都好。

90年代嗰次泡沫，香港都有唔少日本同東南亞資金炒樓，雖然都有「冇殼蝸牛」投訴，但都唔見當時嘅市民反對得好厲害。

其實，將地產視為出口工業，係聰明不過嘅事。試諗吓，人家畀咗錢，買咗件貨，但係又攞唔走，幾着數先！香港人偏偏有錢都唔願意賺，係都要趕客。不過話說回頭，最近已有買家寧願畀BSD都要買香港樓，可見富者越富，真係泡沫世界嘅真理。

特區政府真係要明白，做咗嘢同做到嘢係兩件事。BSD同SSD加長版，好多人一早批死冇用，尤其睇新加坡經驗。特區政府真係要屈服，就要做到樓價跌為止。如以為做咗嘢就收貨，就真係好天真好傻。但做到樓價跌，到時肯定有另一班人出來反枱。中產憤怒嘅威力，先至係特區政府最需要擔心嘅事。

當然，香港同前宗主國有個最大嘅唔同，就係我哋冇獨立嘅貨幣政策；我哋亦唔知，究竟2014年之後嘅聯儲局會係點。暫時嘅理性預期，就係耶倫會接手。睇牌面，耶倫係鴿派，加上美國國會同奧巴馬，好有機會就財政懸崖有一定共識，錢只會繼續來。

與其限制豪宅同外國買家，政府反而應該畀香港人賺盡呢筆錢。

至於中產置業問題，除樓價貴，收入增長亦慢。要為港人增值，唯一出路係食四方飯。各種限制唔會增加最低層嘅收入；最頂嘅一班人，永遠都可以去第二處繼續炒。

李兆富