爽報 (財經V28, 2012.11.19)

立法會大舞台，政演同官，玩千王之王扯貓尾角色扮演劇。

思歪政府話要派錢畀老人家，以為香港咁民粹，一定買到好多民望！嘿，點知班政演一個轉身，就大合唱要人人生生世世都有得派；乜嘢長者生活津貼，雞碎咁多，就同來晒埋政府冷，仲要得戚咁唱：「人人有得攞，公公婆婆笑呵呵！」

搞到咁，有兩個可能：一，思歪好天真咁以為，派錢畀公公婆婆，有民生做籌碼，一定可以做到第一次立會大團結，同西環北京證明，自己唔係廢柴，暫時冇需要頭暈身㷫手痛腳痛。二，思歪深謀遠慮，以退為進。長者津貼擺明係賣一個破綻，畀飯民同獻世派乘機左右夾擊，做到政府好似被迫派清光香港。如市民反對，政府就企硬；市民支持，政府又可乘機搞大自己規模，同埋有更多政治籌碼，同班政演要話事牌表演賽。

點知，負責長者津貼嘅張建宗就同班政演講：「你哋嘅聲音，政府聽得一清二楚，家陣邊個話唔幫你哋搞傳聞中嘅退休保障啫，衰鬼！」嘩，張建宗的溫柔，諗到都打冷震！不過佢好似「冧女」咁?住班政演。冇錯，政演第日男扮女裝又好，搵嫺姐卿姐慧琼姐姐帶頭又好，浩浩蕩蕩，衝上政總，帶住哀怨問一句：「你講過唔算數呀？說好了的傳聞退休金呢？」

到時肯定繼續呢種拉扯式嘅欲拒還迎，政府起初就好似好勉強，打多兩個回合就主動出擊，政演到時就要呢樣嗰樣，搞出來嘅政策，就似一棵裝飾到好似聖誕樹咁嘅火箭，你要預咗支嘢一路飛，就一路跌嘢落來，然後就……

傳聞嘅全民退休金，數字上根本站唔住腳。班政演癡癡呆呆，我都算，連政府都主動去整壞香港嘅財政水喉掣，我就真係覺得好悲哀。你話香港係咪有問題？一定有。我話係後生仔搵唔夠，因為係教育失敗，搞到香港新一代唔夠世界各哋嘅精英競爭！

有未來唔去發展，就反而走去用過去綁住未來，呢個政府真係腦生草。後生仔受咗老母同長輩恩惠，要回報係美德，搞全民退休金，係偽道德囉。

李兆富