爽報 (財經V36, 2012.11.20)

 

消費者：「老闆，賣平啲得唔得呀？」老闆：「平？你幫我問吓供應商同業主，睇吓有冇得平？你估我唔想做多啲生意。」

供應商：「我哋都係微利咋！入口乜都貴，你估我哋想㗎咩？」業主：「租金回報率已經好低，你估我想㗎？」

滯脹，就係全世界都呻窮，但又發覺消費品越來越貴，搞到早買早享受，仲要平幾舊。呢個違反經濟原則嘅現象，你唔需要有個諾貝爾經濟學獎喺手上，都會知道，破壞力一定係非常大。

最懸疑嘅地方：「究竟啲錢去咗邊？啲嘢賣到咁貴，邊個賺晒啲錢呢？」如你會諗呢個問題，恭喜你，因你已有正面積極嘅人生，無論順境逆境，你嘅生存能力都會比別人強。

首先，要明白一個道理。由古自今，當權者最重要收入從來都唔係稅收，而係鑄錢嘅壟斷。通脹，永遠收入最多最穩定，一定係政府；就算冇獨立貨幣政策嘅香港，一樣走唔出呢個模式。所以，滯脹嘅日子，一般市民消費力暴跌，但政府庫房就不斷上升。

 

表面平　質量跌

政府入面，薪高糧準，一定最少壓力。我唔想挑撥人與人之間嘅妒忌。不過，事實係，當你收入又穩定又高，見到資產價格上升，你都一定想買樓。一般打工仔嘛，見到衰退，都腳軟唔敢買樓啦。結果，賺到盡嘅又係邊個？

至於一般人，最大嘅壓力就係可供消費嘅收入，越來越少。結果，慳，成為一個社會主題。

「窮人買唔起平嘢。」呢句話，係一個貴而不富嘅朋友講嘅，意思指，因窮人畀唔起錢，選擇少，焗住買貴嘢。

最好例子，就係劏房。政治演員，見到劏房呎租貴過大酒店，好似發現新大陸，係毫無常識嘅表現。從來，市場上就係越大件貨，越筍，張單就越貴，不過「斷斤稱」，就越平越靚。

滯脹下，只會有人做下價貨，表面上好似買得平，幫人賺錢，但其實質量都跌。換句話講，買樓收租，都係劏房業主賺最多。香港，其實已經進入滯脹，大家自己睇路啦。

 

李兆富