爽報 (財經V33, 2012.11.21)

 

「董建華做特首幾好呀！」每個露宿者，背後都有個令人心傷嘅辛酸故事，但係用老董做故事，除咗有一份斯德哥爾摩症候群嘅黑色幽默，仲帶有一種強烈嘅復仇味道。

噚日，《蘋果》有篇人物訪問，講社區組織協會嘅幹事吳衛東。話說呢位仁兄服務露宿者，蘋果記者想當然話，人家中大經濟系畢業，唔去搞金融，走去服務露宿者，好偉大呀，後現代雷鋒呀。

雖然我唔知道蘋果嗰位記者，點解咁有慧根，參透宿命因果，可以睇到呢位吳衛東入金融業就一定係康莊大道。

但係，我最唔明嘅係，點解呢位「雷鋒」會覺得窮人最懷念的，竟然係世家權貴出身、搞到香港好多中產變無產嘅董─建─華！

 

「最緊要人哋衰！」

早幾日響臉書上面，我不經意留咗呢一句，「這個城市的核心價值之一，就是不要阻人發達。」，有讀者提醒：「唔係喎，你講嘅係以前嘅事。E家嘅核心價值係：不求自己好，最緊要人哋衰！」

明晒。引述呢位吳衛東：「（董建華）又講香港有100萬窮人，但提完之後就腳痛落台。」係喎，董建華都未完成香港勝利回歸共產，得嗰100萬窮人。唔知董建華之前，香港有幾多窮人呢？又唔知道，有幾多人因為董建華，由業主變窮人呢？吳衛東話，好多露宿者97年前月入過萬，點解今日咁窮呢？

記者話，吳衛東對思歪「疑中留情」，希望佢會推老人退休金。另一邊廂，又有社福演員，推班坐輪椅嘅公公婆婆出來，要求「傳聞嘅退休種金」。歐洲咁窮困，香港點解唔學呀？不過，有眼利嘅朋友就話，一係就推穿金帶銀嘅公公婆婆出來，話到明「傳聞嘅退休種金」唔係福利，係人權，應該坦坦白白嘛。推窮公公窮婆婆出來，為富叔叔富嬸嬸攞錢，乜野道理先？

「雷鋒」加埋「傳聞嘅退休種金」，香港係唔係忽然間好關愛、好溫暖呢？唔通全香港人都係窮人，香港就最關愛？同情心係一個社會必須嘅，不過濫用就唔好啦。

 

李兆富