爽報 (財經V35, 2012.11.27)

睇新聞，永遠第一個問題，都係推測消息來源，同埋新聞見光嘅時機。新聞工作者好簡單，單料夠爆、獨家，就好似鯊魚見到血，有前冇後，打死罷就。明白呢個道理，就知道傳媒運作最緊要嘅係乜嘢。

其實《紐約時報》上個月，即係非常敏感嘅十八大之前，已經報道溫家同平保（2318）嘅事。繼滙控（005）將手上平保全數沽出，今個星期嘅話題，就係究竟十幾年前，時為副總理嘅溫家寶同人行行長戴相龍，有冇以權謀私。

報道內容有公開資料，亦有內部文件。其實所謂內部文件，亦唔係乜嘢國家機密。畢竟平保確實得到豁免，避過分拆，亦係公開嘅事。牽涉嘅人亦唔係神秘人。呢樣報道，資料來源，唔易推測。

搵唔到原因，就睇有乜誘因。最正路諗法，就係政治權鬥。另類諗法，就係外國勢力，想做低中國。亦唔可以排除，行頭內嘅競爭對手，出招鬥法。件事想要有幾多想像空間，就有幾多想像空間。

政府財金互為表裏

先旨聲明，我唔係幫溫爺講說話。大陸行事，由潛規則到明規則，究竟係點，大家心照。George Orwell寫嘅《1984》，到今日都值得重溫；當權嘅人鬥法，唔代表社會變得開明。真正開放社會，搵錢唔需要權鬥。講到底，都係制度嘅問題。

財金行業，一直以來，都係受到高度監管。經濟每次有問題，就有人會話，監管不足。監管越多，就越多政府嘅手指模。呢啲手指模，無論有心定係無意，都會令人懷疑，究竟有冇人上下其手。就算外國，各大投行，何嘗唔係同政治圈子過從甚密？畢竟，財金行業要有政府撐腰，先至可以用人家嘅錢槓桿再槓桿；政府亦要靠財金行業，財技治國。

唔救、唔管、唔做貨幣政策，聽落好似好危險。不過，政府同財金業大被同眠，一樣係一種社會嘅禍害。溫家同平保事件，最重要嘅反省，係如果冇政府嘅撐腰，今日呢間公司會唔會有今日嘅成就？政府對保險業嘅介入，應該有幾深？唔改變制度，任何人做總理同人行行長，都會有同樣嘅事情發生。

李兆富