爽報 (財經V33, 2012.12.04)

 

之前講過，思想赤貧乃貧窮之本。

「幾十年前，機會處處。今日，香港得番地產同金融，冇晒機會。」講呢句說話嘅人，睇唔到其他機會，自然會咁講。

「寫app囉。」之前我隨便咁樣舉一個例子，換來一班未來社會棟樑話：「講咁易呀？唔係人人都識囉？有幾多人成功呀？」

各位大哥大姐，如果你覺得人生應該係好容易，對唔住，幸福並非必然。

「咁叻，你不如話畀我哋知，機會喺邊吖，笨！」又對唔住，對每個人，機會嘅意義都唔同。不過，對某啲人嚟講，每日都見到機會。

要睇到機會，第一件事，就係盡量畀自己見到多啲嘢；假如將自己嘅眼界，局限香港呢個彈丸之地，睇到嘅機會自然少好多。不過，就算係淨係香港，每日都有好多問題未解決，每個問題，都係潛在嘅機會。但係如果心態上消極，就只會將問題視為問題，永遠都睇唔到機會。

「香港淨係得地產同金融呀！」如果真心相信租金貴令到生意艱難，就諗辦法囉。

有人開格仔舖，有人開樓上舖。開樓上舖同格仔舖嘅人，又有宣傳問題……我只係隨手執啲例子。其實，香港嘅問題，又點止租金咁簡單？

自從最低工資扭曲勞力市場，我見到有叻仔就嘗試引入自動售票機、派籌機。除此之外，仲有大把做生意嘅問題要解決，去到最後，係睇吓有冇心去發掘。

「講咁易呀？錢呢？技術呢？」如果問題咁易解決，人家就一早解決咗。

不過你又點知問題冇可能解決？社會棟樑，連小小嘅事都處理唔到，就以為可以改變個制度，有人話佢哋偉大，我會話佢哋逃避現實。

「即係你叫大家接受現實啦？」

唔係。剛好相反。只不過，改變現實，要一步步嚟。想做買賣但又唔想交租，網上得唔得呢？事實上，香港大把人做零售，一樣搞得掂。成功與否，除咗租金，賣嘅嘢有冇賣點，更加重要。如果人賣你又賣，同兩大超市正面競爭，梗係輸死啦。

睇到一啲未滿足到嘅機會，做生意，就可以人唔做我做。

 

李兆富