爽報 (財經, 2012.12.14)

最估唔到，係伯南克連失業率目標都白紙黑字寫做宏觀調控目標。只不過你一個月之前，將失業率目標寫入宏調目標，都只不過係學術討論。我冇吹水㗎！自從70年代滯脹之後，有個名詞好少人提起：Philip’s curve。

冇讀過經濟學嘅朋友，容許我好簡單咁解釋：Philip’s curve就係假設，失業率同通脹，大致上成反比關係。即失業率高，亦就是有人冇工做，工資受壓，物價斷估都好難升，從而得出結論，通脹率都會低；反之，失業率低，人工物價都會升，通脹一樣水漲船高。70年代嘅滯脹，兜巴星班填鴨式教育嘅偽經濟學家：就算用消費物價同政府統計嘅就業數字，都推翻Philip’s curve嘅結論。原來，可以有人冇工做，物價都一樣升。零分，重做啦唔該。物價係貨幣現象，生產同就業係另一個層面運作嘅經濟問題，當中嘅傳導關係並非純粹嘅簡單反比。不過，偏偏就係有班人，死都唔肯接受現實，又唔睇清楚個世界係點運作。過咗30幾年，又從床下底將Philip’s curve搬出嚟，借屍還魂。

又唔怪得班人咁諗嘢。聯儲局嘅成立，乃係根據一條法例，叫聯儲局條例；法例又講到明，聯儲局有兩大任務（Dual Mandate），就係控制通脹同就業。佛利民曾講過Dual Mandate要廢除，聯儲局只有一個功能，就係保持物價穩定，亦即係調控貨幣供應。可惜，用一般牛頭角師奶嘅邏輯：「兩個功能，梗係抵過一個啦！」結果，聯儲局經過咁多年，終於將兩大功能合而為一，內功心法就係呢套必然練到走火入魔嘅Philip’s curve。

市場基本原則：一，任何價格，取決於供求，央行只可以控制貨幣供應，但冇能力決定貨幣需求，所以，貨幣政策都未必可以影響貨幣最終價格，即通脹；二，價格取決於供求，價格係果，供求係因。諗住以價格影響成個市場嘅供應，係倒果為因，價格扭曲只會同時減低供求，完全對經濟冇貢獻。

不過，好可惜，呢個世界，就係劣幣驅逐良幣，偽學術變真政策。良幣去咗邊？搵真銀啦梗係！

李兆富