爽報 (財經, 2012.12.17)

上星期最惹笑嘅一單新聞，應該係日本有個經濟學家話，靚仔因賺得比其他人多，所以應要交雙倍入息稅。好多香港女士，即刻話你班男人，一定一個二個搶住去自願交稅，證明自己係靚仔。

呢單新聞，其實非常通識。除咗用常識推理，究竟靚仔係咪有先天優勢，更深層次問題係，靚仔有優勢又如何，點解要俾人徵重稅懲罰呢？

靚仔係咪有先天優勢？一時時啦。不過，如果老竇大把又點計？「所以要打重遺產稅囉，如果唔係，窮家子弟永遠都唔使旨意從後趕上」。妒忌人家靚仔，未必人人肯認，不過妒忌人家有錢，就好似天經地義。妒忌嘅本質不變，我唔明點解啲人會覺得，妒忌有錢人可以毫不羞恥。「咁你即係話，要崇拜有錢人，要迷戀靚仔啦！」我發覺，妒火中燒嘅人，連基本邏輯都唔識。唔需要去憎恨妒忌，唔代表要去迷戀崇拜。

好多人，平時講道德，講到成個人都飄起晒，升上高地去：「要為窮人，要為醜人。」甚至乎，更加超然係，當自己係公認嘅有錢人同靚仔，竟然都去關懷窮醜，個種聖人嘅形象，真係迷倒唔少人。每個人都係獨立個體，每件事都要分開判斷。如果一個人成世人都做壞事，但偶爾做番一兩件好事，應該將件事同個人獨立分開去睇。同樣道理，一個人係有錢人，靚仔、窮人、醜人同佢做嘅事應該分開睇。「講就易。」係呀，但係，就算全世界都歧視，我哋都冇理由歧視自己。人哋話：「你老竇係邊個，竟然妄想發達？」你都會覺得個心唔舒服。日日同自己咁講，你又點可能幸福過生活？

之前講過「思想赤貧」，原來都有「思想醜陋」，公共政策點都唔可以改變呢啲根本問題。但係妒忌就可以推出好多公共政策。靚仔稅可能都係得個講字，不過，累進稅、遺產稅，就永遠都有市場。
退一萬步講，賺得錢多嘅人，老早就係支撐個稅收制度；賺咗錢嘅人，賺錢嘅時候已經交過稅；累進稅、遺產稅，除咗妒忌，真係冇其他道理可言。

李兆富