爽報 (財經V33, 2013.01.25)

近來facebook經常見到有人貼「如有100萬個like，我老闆會加我一倍人工」之類嘅相。我手痕，自己都整番張，卑微嘅願望係：「思歪冇話過唔應承停收一年薪俸稅，假如我有100萬個like的話！」

「唓，點會啫！思歪有應承過你咩？」大家諗吓都知，思歪應承又有乜嘢用？所以我都話，思歪冇話過唔應承。其實我最想知道就係，假如有人問佢：「政府有咁多盈餘，點解今年仲要收薪俸稅？」究竟佢會點答。「政府收入唔係永遠都咁多，所以無論日子點樣，都一定要積穀防飢。」如果係以前嘅官，一定會咁答，大家條氣幾唔服，鬧兩句守財奴就冇嘢好講。不過今日個政府，亂咁開位又想有作為，想呢樣又想嗰樣，又亂使錢，我唔知啲官憑乜嘢講呢句話。交稅係納稅人義務，不過納稅人都有權利！唔係話要政府派錢，而係納稅人有權同政府講，你咪亂使錢益自己友，要幫真正有需要嘅人，慳住使；政府係納稅人供養，唔好成日擺官款，唔好以為自己高高在上。

冇咗納稅人，政府就冇存在嘅可能。所以政府應公道啲，庫房有盈餘，就唔好再抽取民脂民膏。停收一年薪俸稅，好似好激，但呢個建議比叫政府派錢，合理得多；既然政府唔係等錢開飯，憑乜嘢向廣大市民攤大手板？

盈餘多到唔識用，已搞到一班政治演員話要人人有份派。派錢，即係同下一代講，錢係天跌落嚟。我真係唔想見到香港嘅未來，以為唔使做都有得分！

李兆富