爽報 (財經V27, 2013.01.30)

喺美國，有人話搞個Seasteading，即係去公海做個超級浮台，然後就訂立自己嘅國度。Seasteading背後嘅金主支持者，唔少係矽谷精英。佢哋睇唔過眼美國政府，或覺得美國移民政策拒絕好多叻人，阻人發達，但又搵唔到比美國更好嘅地方，索性諗點樣搞個新大陸。呢種諗法非常之美國，畢竟當年美國立國就係靠一班唔再留戀舊大陸、為尋找機會同自由嘅新移民。本來，香港都係移民組成嘅城市。當然E家大家對個地方唔高興，有能力嘅就再搵其他地方出路。身邊朋友未必講到出口話想移民，但好多都諗吓，話唔願意走嘅，其實都唔少有本外國護照喺手。

前兩晚同一班男人飯聚，席上大家少不免講政治時事，其中有個比我更反思歪嘅火強兄話：「思歪份施政報告，做咗兩件好事：一，講真話，話畀香港人知，政府真係冇地；二，話畀香港人知，政府每次干預樓市，就更炒得瘋狂。」

不過，火強兄唔似班未來社會棟樑咁，只係識得鬧：「我都有諗過，政府可以點樣用短時間去滿足增加單位供應嘅政治訴求。其實，政府唔夠地，咪搬啲人出海囉。政府可以去收購幾十隻大郵輪，每艘1,000間房，都可即時供應幾萬個單位啦。呢啲單位講明係暫時公屋，到政府搵到地，起好新公屋，咪賣番出去畀人搞郵輪生意囉。而且，E家即刻泊一萬幾千個單位喺九龍東，仲可促進地區發展，幾好呀！」好似有啲道理，不過呢個政府咁老套，點會諗啲咁破格嘅方案吖。

李兆富