爽報 (港聞V04, 2013.04.03)

「工會有乜唔妥？基本法唔係話香港人有結社集會自由咩？你哋唔通反對香港市民呢個基本人權？」

結社集會，當然係基本人權。不過，工會對自由呢個概念，有雙重標準。工會強調神聖崇高嘅「集體談判權」，其實正確的，係法定罷工地位，係剝削其他打工仔選擇「唔加入工會」嘅工作權利。

「加入工會，有首領代出頭，又唔怕俾人炒，點解唔人人都加入？」對工會信徒，認為打工仔事事都應該有選擇同自由，惟獨參加工會，就一定要「團結」。

團結，意思即係，所有人都要一致行動；從另一個角度睇，工人唔可以太勤力，亦冇得搏上位，呢的叫做又三十六，唔做又三十六。曾幾何時有好多人，就係知道呢套唔通，所以千辛萬苦游渡海泳來香港。新一代社會棟樑，又點會明白呢個道理？

再講，香港好多打工仔，其實都喺中小企工作。零碎嘅職場生態，其實不利大規模工會組織。所以，香港一直都唔係工會城市。

當剩低全部係大財團，工會階級鬥爭綱領先打得響。好多搞工會嘅社會棟樑，其實冇足夠智商去明白自己做緊嘅事，會有乜嘢結果。近年香港中小企空間越來越窄，社會棟樑一味條件反射賴地主加租，佢哋從來都冇認真睇過，工會主張嘅政策，例如強迫金、工資工時立法以及各種勞工規限等，點樣千刀萬剮將中小企逐一凌遲。

（工會政治知多的．二之二）

李兆富