爽報 (港聞V06, 2013.04.08)

「市場會失效。」呢句說話，好多中學生都會接落去講：「所以有時要政府出手干預。」邏輯上，市場搞唔掂，政府亦唔一定搞得掂。可惜，呢個謬誤，以訛傳訛之下，點都揮之不去。

其實，解決問題第一步，就係要先了解問題，呢個常識響今時今日嘅香港似乎漸漸失傳。

每年夏天，獅子山學會都會有暑假學師計劃，今年亦唔例外。學師計劃重點，乃係了解市場。何謂了解市場？有學師，一個暑假之後，學到股票外滙皮毛；亦有學師因此對公共事務有一套唔同睇法。不過，今年我希望，可以培訓出一班識得去批判市場嘅年青人。

「批判市場？」你無聽錯，我亦無寫錯。真正了解市場，先有條件去批判市場。所有創造，都係源自於對現況嘅不滿。社會、市場永無完美，不足之處，答案唔一定係政府干預；更多可能，係一間公司，又或者一個公民社會運動。

如果你關心社會，但又相信自由市場創造價值能力，歡迎你參加今年獅子山學會嘅暑假計劃。原則上，我地不限年齡，更不限學歷，大前提要對世界有基本好奇心。

報名方法：以不多於一百字，講述一個你覺得仍然未解決得到的市場問題，並將回覆電郵到info@lionrockinstitute.org。

李兆富