爽報 (港聞V04, 2013.04.11)

資本家同工人，係唔係敵人呢？另外一個問題：究竟工會最大敵人，係資本家，定係其他工人？

先答第二條問題。工會既然將唔願意加入工會行動嘅工人，稱為工賊，亦反對外勞，話係搶飯碗。好明顯，工會唔單止反資本家，亦將部份工人視為敵人。當然，工會首領話，非工會就係企響資本家一方，亦即係出賣勞工，敵我矛盾，非常清楚。當然，工會首領仍然會話，最大敵人，仍然係資本家。

所以，工會話團結工人去對抗資本家；排斥非工會成員，係手段，並唔係目的。

點解會有工人唔願意加入工會？美國有好多州，要透過立法，去保障工人唔需要強制「被加入工會」嘅自由，是為「工作權利」（Right to Work）。

一，如果唔加入都有着數，點解要加入，呢種靠邊站，是為搭順風車（Free Riders）。二，唔認同做又三十六，唔做又三十六，覺得自己可以靠努力，由工人變管理層甚至資本家，呢種人，工會首領叫階級敵人。

客觀事實又點呢？根據美國國家勞工關係研究中心（National Institute of Labor Relations Research），有工作權利立法嘅州份，由2000年到2010年，平均工資上升11.3%，但係工會當道嘅州份，就只有0.7%。至於就業率，有工作權利嘅州，同期上升0.3%，但係工會當道嘅州，就下跌5.5%。

資本家同工人，唔一定係敵人。用番香港傳統智慧，街外賺，大家一齊賺，邊個攞多，邊個攞少，睇本事。

李兆富