爽報 (港聞V06, 2013.04.19)

今時今日香港，做生意政治化，任何決定都要向公眾交代。冇錯，交代呢個用詞，感覺非常文革。要怪，就怪香港好多國企，又或者類似國企嘅半公營半私營怪物。由主題公園到集體運輸，政府都有能力影響決策，所以呢啲機構嘅每個決定，政治演員都想見到自己嘅手指模，肯定自己嘅存在意義。

「只要影響公眾，我哋就有權過問！」由插手國企到半公營機構，政治演員再進一步，就想管私營企業。衣、食、住、行，除咗時裝未立法規管，其餘三範都已經政不離經。當四大皆管，香港就正式走入「阿媽教仔式管治」，洋學名叫：Nanny State。

變本加厲，最後一步就係消費者品味都管，屆時，真係有得揀都唔做老闆。不過，未變成阿媽教仔式管治之前，政治演員要宣洩澎湃嘅控制慾，就會針對客戶群眾夠多嘅私營企業：交通、能源、電訊、零售……只要有任何事故，政治演員永遠先聲奪人，要求更多話事權。不過，無論搞到幾衰，政治演員都唔需要負責，最終，消費者又有乜得着？

李兆富