爽報 (港聞V04, 2013.05.09)

前晚，上now錄《大鳴大放》講碼頭工潮，遇啱職工盟現任總幹事蒙兆達，梗係問佢撐唔撐清潔外判商罷工。佢答案斬釘截鐵：「唔撐！」偉大工人領袖想資本家消失，清潔工全部轉做政府工；最終極一步，當然係全民政府工，落實蘇維埃式經濟。

講返呢次《大鳴大放》，老實講，本來都唔想去，見主持係友報am730副社長馮振超，負責監製羅樹基又好似好有「誠意」，就捱下義氣啦。點知，真係中伏。以後我會提醒自己，老毛嘅「大鳴大放」，實質就係反右運動！

點解咁講？我只不過話想請教下職工盟，佢地開口埋口講「誠意」，究竟係點解。職工盟話，資方唔肯「坐埋嚟傾」，就係「冇誠意」，究竟係咪事實呢？「誠意」又即係點解呢？我一開口追問，主持就打斷話柄。計我話，搵人做嘉賓又唔畀人「大鳴大放」，就真係冇誠意！誠意，就係想要乜，坦坦白白咁講，唔係兜圈扮嘢借啲意。

公道啲講，主持都有問蒙兆達，開廿幾巴仙加薪要求，係策略定係底線；蒙兆達亦承認，其實唔係冇得傾。其實我都係想知，職工盟高調行動，係唔係借事件去爭取強制集體談判。唔通市民唔關心？節目入面，我問主持：「大家講唔講事實先？」佢話好，我就提出美國有州份強制僱員加入工會集體談判，亦有州份容許僱員可以自由選擇去個別議價，後者就業明顯增長高，僱用又條件好。點知，職工盟一句「個別例子」就算答咗，主持自己唔追問落去，亦唔畀嘉賓追問。我都有主持節目，更加係有強烈個人意見嘅主持，但唔會咁冇「誠意」，搵嘉賓做佈景囉。

李兆富