爽報 (港聞 V04, 2013.05.14)

終審法院裁決，變性人W小姐嘅婚姻合法。呢宗司法覆核，肯定會引起爭論，尤其係同性婚姻嘅合法性。

兩個人嘅關係，點解要有政府介入？婚姻，係兩個人承諾，原則上一生一世，無論富貴貧賤，健康抑或痛苦，至死不分離。咁長遠嘅承諾，當然要有見證。由街坊保長到宗教組織，傳統上都充當婚姻見證嘅角色。自從現代政府包攬各種社會功能：出世要有出世紙證明國籍身份、大人亦要帶身份證出街、報稅一樣要分單身已婚，好自然，最終證明一段婚姻嘅機構，亦由街坊社會同教會變成政府。

從人類學角度，婚姻承諾係為咗下一代。兩個人，連同雙方兩個家庭，的確可以為小朋友提供更穩定嘅成長環境。傳統婚姻觀念，亦一直主導社會組織同宗教團體，所以大多數非政治傳統證婚人，亦只會承認男女之間，為生兒育女嘅婚姻。

同性戀、變性人同伴侶，甚至一男一女之間，有冇愛情，除咗兩個當事人，其他人完全冇發言權。同性戀合法、變性亦合法，兩個人想點樣生活，都係個人選擇自由。婚姻政治化，反映政府干涉得太多。兩人之間嘅承諾，其實關政府乜事？

話說回頭，各種性取向的朋友，你哋要社會接納，唔係要政府認同。保守傳統價值嘅組織，有佢地本身嘅觀點，亦有權去接受或者拒絕每個證婚嘅要求，宣揚佢哋相信嘅家庭價值觀。政府承認，又代表乜呢？

李兆富