爽報 (港聞 V08, 2013.05.20)

輕鐵炒車出軌，運輸及房屋局局長張炳良回應傳媒時表示，由於事故令輕鐵服務受阻超過上限，所以港鐵最高可能被罰款1,500萬。

對一般市民，1,500萬係好大數目。不過，我好懷疑對港鐵呢類國企，罰款有幾大阻嚇呢？話說回頭，做官，就一定覺得罰罰罰罰罰，係管治嘅唯一方法；罰咗，就等於做咗嘢。

現實世界，對做生意嘅人，最大懲罰，唔係罰錢，係罰唔准做生意。香港交通政策，有樣嘢叫做鐵路優先；簡單講，就係有鐵路，就唔容許其他交通工具直接競爭。所以，香港就有小巴同的士組織，經常為反港鐵壟斷出聲。

「路面空間有限，當然要規劃使用啦！」迷信政府嘅人，好易照單全收官方填鴨式答案。不過，如果用自己嘅獨立思考去諗下，就知道：一，的士、小巴先至唔會吉車浪費路面空間，皆因人家每分每秒都係搵錢機會；二，好多人需要的士、小巴嘅服務，亦覺得呢兩類交通工具更方便有效。

政府成日話鐵路集體運輸環保又有效，實情係除非每卡車都坐滿人，否則鐵路好多時都要靠政治傾斜去保護。事實上，屯門元朗交通同城市規劃一塌糊塗，好大程度上係交通規劃問題。試問一個淨係識罰錢同推卸責任嘅政府，又點會識得諗辦法去理順問題。

李兆富