爽報 (港聞 V08, 2013.05.24)

「先錢後貨，所以政府要監管」，直線思維，覺得政府唔做嘢，消費者就會任人魚肉。

政府提出要監管「儲值支付」；例牌動作，都係發牌當監管。官方文宣，就講到業界學者都支持，代表資訊科技界嘅政治演員莫乃光，又好似無乜立場。事實上，莫議員好多立場，我都啃唔落，或者佢無立場，好過有立場。不過，既然冇人識得頂住政府，如無意外，政府又係要乜有乜。

儲值支付，即係先錢後貨，對企業除咗係現金流，其實都係一種方便，尤其係小額虛擬交易。幾年前，我曾經要去台灣搞儲值支付系統，亦領教過當地類似嘅發牌制度。

老實講，當時我都算係代表一個大企業去搞，但始終唔係金融機構，處理呢類牌照，頭痛到不得了。結果，我哋最終都係要將支付系統，外判畀一間金融機構。收入，當然要同人家分；無論我哋賺蝕，金融機構點都收到十足。台灣人，叫呢啲做「通路費」，廣東話唔知可唔可以叫「買路錢」？

所以，與其話保護消費者，不如話，政府要保護金融界既得利益。但係呢類寡頭壟斷，絕大多數都代表消費者選擇更少，小企業同創業者更難創新。不過，政治演員同政府就一定可以好大聲講：「做咗嘢。」

李兆富