爽報 (港聞 V08, 2013.05.24)

政府為討好環保分子、社會棟樑、政治演員，每次講焚化，都一定加句：「長遠都係要減廢。」

減廢，當然好，每次浪費，我都會有罪疚，相信好多人，其實都有類似嘅諗法。但要將主觀願望，轉變成政策目標，需要嘅唔係偉大理想，而係政治手段，以及對現實嘅客觀理解。

連小學生都知，香港人每日各種衣食所需，絕大多數透過每日一船船進口香港，無論點減廢，現實都唔會變。換言之，如果無辦法將廢物輸出，就惟有將廢物堆積，又或者將廢物由固體變成氣體，隨風消逝，讓塵歸塵，土歸土。呢種處理廢物方法，叫做焚化。不過，環保塔利班刻意製造綠色恐慌，講到焚化好毒。

將香港睇成一個有機生命體，「堆填」係「積聚廢物」，「焚化」就係「消化廢物」，而「輸出」就係「排出體外」；要繼續生存，香港就一定要消化排出。所謂減排，就好似古代道士苦行僧，叫人斷食練仙，但從來無人因此長生不老。每個人都想減廢，做得到亦自然心安理得。

不過，公共政策考慮唔可以主觀感性蓋過理性，除咗減廢就乜都唔做。唔食唔着唔繁殖唔進出口唔諗唔消費，係全民涅槃入滅，斷絕六道輪迴，環保塔利班自己亦都只講唔做，點解要全香港人陪佢哋扮清高？

李兆富