爽報 (港聞 V08, 2013.05.29)

有位廚藝甚為了得嘅大小姐，去茶樓飲茶，例必唔會叫山竹牛肉小籠包之類，佢話：「我唔食嗰啲唔知道係乜嘢肉做嘅點心。」經過大小姐指點，牛丸驗出有其他肉嘅新聞，我完全唔覺得出奇，反而因此更欣賞大小姐對食嘅堅持。

早前，洋人肉丸驗出有馬肉，軒然大波。不過，細心研究食物嘅歷史，就知道做肉丸，真係乜嘢肉都滲少少，如果唔係點解要打肉丸；將肉質打到「阿媽都唔認得」，完全冇晒纖維，就係為咗可以令唔同嘅肉可以「和諧共處」。所以，將墨丸、魚蛋、貢丸……等攞去驗，相信會有更多出人意表嘅發現。

老鼠肉做嘅羊肉串、又或者用合成肉組成嘅機切羊肉片，聽落更加得人驚，但竟然係分子料理嘅先鋒。無錯，叫做分子料理，即時升值百倍。

正如無蟹嘅蟹柳，當大家知道食物嘅成份，唔代表會食少咗，重點係消費時嘅心態。幾年前爆出大陸出現假雞蛋，當時我已經覺得，點解做假雞蛋嘅人咁無生意頭腦？做好少少質量控制，用化學但唔會傷人嘅材料，假雞蛋即時可以打正招牌叫自己做「素蛋」，擺喺日式超市，分分鐘賣十幾廿蚊一隻。

大陸人其實唔係無腦，只不過營商環境差，知識產權冇保障，冇法治，加上資訊唔流通，正常人都只會諗，點樣盡快搵一大筆錢，然後遠走他鄉。佢哋又點會諗到，原來自己嘅技能，包裝下，加少少良心，就可以叫做分子料理？

李兆富