爽報 (港聞 V10, 2013.05.16)

「香港勝在有ICAC」呢個神話，好多受填鴨式教育薰陶嘅人，都信到十足十。如果有一個機構，可以化腐朽為神奇，處理所有貪腐問題，呢個世界就真係美好到不得了。

「英國人管治，就可以搞得掂中國人貪污嘅問題」，好多歷史修正主義者，有意無意忘記，當年好多人上街要拉嘅，叫做葛柏，係洋人，退休之後去咗西班牙。

貪污，其實就係用公權力換私利；對付貪污，一係將公權力分散，形成制衡，一係就斷絕利益來源。當年貪污最嚴重，係無論規模抑或權力都非常大嘅警隊。六十年代，英國殖民官見警隊貪污威脅管治，就認真處理：一，賭博合法化，用馬會鬥大檔；二，將緝毒和邊境進出口管制，交由新成立的海關；三，管理商販，則由有意見監察的市政總署負責發牌，減少黑社會尋租、警察收片等。完成呢一系列動作，再加廉署高調行動，政府上下，見到連最有權力嘅警隊都夠「薑」去打，廉潔先至漸漸成為香港所謂嘅核心價值。

英國人從問題核心去處理貪污嘅智慧，其實先至係真正嘅香港核心價值。可惜，殖民地教育無教香港學生，去欣賞十九世紀歷史學家Lord Acton嘅名言；洋人走後，只留低一班崇尚權力嘅香港人去膜拜ICAC呢個圖騰。

李兆富