爽報 (港聞 V14, 2013.06.04)

是日六四，宜反思。

八十年代，中國大陸最重要嘅政治議題，係「資產階級自由化」。

胡耀邦因為縱容知識分子宣揚資產階級自由化，八七年被一眾中共元老迫落台。八九民運，就係以悼念胡耀邦開始。

極權國家，就係可以因為一個詞語，一個概念，令到元首級高官下台，令到社會躁動，令到語言和思想被扭曲。話說，五九年，蘇維埃話毛澤東唔夠共產，劉少奇就好天真好儍咁寫文章反駁，中國唔會畀資產階級自由化。結果文化大革命，紅衞兵到處屈人係右派自由派，文鬥武鬥，國家主席劉少奇都幾成「黨內頭號走資本主義道路當權派」，係「叛徒、內奸、工賊」。六七年被軟禁，兩年之後因失救死亡。

劉少奇落台廿年之後，就到胡耀邦下台。雖然中共平反咗劉少奇，近年胡耀邦忌日又久唔久有悼念文章，不過極權政治嘅本質仍然冇變；原則上，中國仍然係社會主義國家，反對社會主義，仍然係一條死罪。

「乜中國都唔算資本主義國家？」當一個國家有咁多國企壟斷，一般人嘅產權冇法治保障，就算有資產都唔可以自由投資到境外，呢個都算資本主義？社會棟樑眼中，有買買賣賣就算資本主義，皆因佢哋無論對左派理論，抑或對自由主義，都一知半解。事實上，資本主義、法治同民主，根本就係文明社會三條支柱，缺一不行。所以，如果今日要我大聲叫一句口號，我會話：「旗幟鮮明堅決擁護資產階級自由化！」

李兆富