爽報 (港聞 V10, 2013.06.05)

「李嘉欣咁五官分明、林志玲咁修長嘅身段、陳妍希咁純潔嘅笑容……」用所有女神最煞食嘅賣點，混合起來，編制一個女性競爭力排名，唔知會唔會令到姊姊妹妹積極妝扮、做運動、檢點行為儀態諸如此類呢？

排名，都有一個功能，就係令到「被排名」嘅人，會跟住排名標準，去自我改造。香港人，自細慣咗考試排名，對呢種現象，應該唔會陌生。瑞士洛桑管理學院嘅競爭力排名，亦有同樣效果：香港競爭力排名下跌，即刻有人出來抽水，話要做呢樣做嗰樣。

競爭為何物？師傅教落，競爭就係用唔同嘅方法，去做得比人家更多更快更好。競爭力排名嘅迷思，在於假設有一個完美嘅標準答案，只要一個地方嘅政府跟到十足十，就會成為世界最具競爭力經濟體。

經濟學101都有講，每個地方都有自己嘅相對競爭優勢；唔一定要有絕對競爭優勢，都一樣可以透過貿易，創造價值。所以，依書直說，經濟政策應該好簡單，就係畀人貨通有無。其他促進經濟競爭力政策，好多時都係一廂情願，結果事與願違。

排名同現實，未必有抵觸，不過亦唔應該將兩者混為一談。

李兆富