爽報 (港聞 V12, 2013.06.07)

深夜，某間24小時營業連鎖快餐店，仍然燈火通明；有後生仔三五成群玩三國殺，亦有情侶旁若無人，更加有無家可歸嘅露宿者。

呢間被國際社會棟樑恨之入骨嘅連鎖快餐店，雖然唔係善堂，但確實積落唔少陰德。提供就業機會不在話下，24小時營業，亦為唔少人提供深夜好去處；年輕人唔需要流落街頭，情侶有得嘆冷氣又唔需要怕被老笠，最重要係露宿者唔使瞓天橋底。唔知係公司政策，抑或快餐店職員有惻隱之心，半夜，露宿者唔會被趕；默契係，一到天光做早市，就唔好阻住做生意。

有一晚，我見到有個露宿者，好自動自覺，幫手收拾地方。實情係，最低工資立法後，好難請人，所以快餐店深夜市，嚴重人手不足。不過，露宿者亦好似覺得自己有一份貢獻，免費佔用人家地方，亦唔會太過過意唔去。

「點解唔正正經經搵份工呢？」我自言自語問。說時遲那時快，露宿者就將餐盤上面嘅垃圾，跌到一地都係。唔好誤會，我並唔係話佢冇工作能力。不過，幾分鐘後，有位年紀更大，穿着制服嘅員工叔叔，終於出現執手尾，眼明手快。

社會棟樑唔明白，大企業成功之道，係制度同培訓，令人人都有生產力。各取所需，各盡所能，好可惜，只係一個偉大理想。

李兆富