爽報 (港聞 V10, 2013.06.13)

「地產係香港毒瘤！」社會棟樑秉承馬克思學說傳統，對地主階級恨之入骨。通常，每次出現樓市泡沫，社會棟樑就越係大聲疾呼。

社會棟樑睇唔過眼，有人因為持有實際資產，可以乘通脹順風車，享受財富效應。不過，事實係宏觀經濟動向，可以好快逆轉，上上落落亦有大量噪音，走勢唔係一定明顯；如果冇做足風險管理，橫財好易冤枉來，瘟疫去。

話雖如此，世界上總有幸運兒，低位入高位走。社會棟樑認為呢種炒買致富，屬零和遊戲，有人輸，所以才有人贏。原則上，社會棟樑嘅觀點，有一定道理。就算話炒家因為承受風險加眼光獨到，自己致富，整體社會則願意冒險嘗試進步。但今時今日，現實裏面銀行金融業槓桿最大，正正由於政府以貨幣政策包底。故此，機構投機者近水樓台，賺了通脹的第一筆，小投機者只有選擇跟風保值，又或者眼白白睇住財富被制度逐漸蠶食。

傳統智慧，就係以持有非貨幣資產，抗拒通脹剝削。事實上，持有磚頭交易成本高，只係好過被不斷剝削。偏偏思歪政府，連市民最後一個通脹避風港都要關閉。政府今年以先斬後奏形式，推出懲罰性的雙倍印花稅（DSD），對付持有多過一層自用物業的香港人。

諷刺係建制權貴大多數都持有物業收租。我好想知道，特區問責官以及行政會議成員，會唔會實行「一樓一高官」帶頭沽出手上物業，打擊囤積，刺激供應？

李兆富