爽報 (港聞 V10, 2013.06.17)

隨意行入一間麵舖，點咗一客小籠包再加一碗腩麵，送凍豆漿一杯，盛惠六十五大元。

「呢啲就叫通脹」，以最低工資做兩粒鐘都只係可以買到頹麵一碗，急凍國產小籠包五粒，平與貴，總有個準則！

「資金泛濫，工人輸硬」，由伯南克呢個通脹鴿派上台，唔經唔覺我都寫咗呢個題目七年，大大話話三幾百篇，結果到佢就快要卸任，仍然寫緊同一個題目。

社會棟樑話商家無良、業主狠心。不過，資本追求回報，唔開舖，唔買舖，資金仍然會游去有回報嘅地方。可憐係，工人嘅創造價值能力，僅限於特定時空。好宏觀咁睇，資金越泛濫，勞力面對嘅競爭越大。再者，原料租金不斷上升，生意未必可以完全將成本轉移到售價上面，結果被壓縮嘅，就只有付出勞力嘅工人。

工會主觀願望要求，所有工人加薪幅度同通脹掛勾。不過現實中，增加勞工成本只會加速僱主自動化同精簡架構；唯一例外，就係天下間最難減省人手嘅機構：政府。而且無論係股票抑或地產，香港政府永遠都可以透過印花稅，第一手賺取泡沫橫財。所以，公務員鐵飯碗，實在名不虛傳，無論通脹通縮，點打都唔爛。難怪工會的終日夢想全盤計劃經濟，人人做公務員，做又三十六，唔做又三十六。

李兆富