爽報 (港聞 V10, 2013.06.24)

先利益申報，將軍澳我有物業。不過，我唔反對堆填，但亦唔支持擴建堆填區；我只想用呢個例子，反映香港政策制定嘅偽善同愚昧。

香港幾乎所有消費品，即係垃圾終極來源，都係入口商品。換言之，靠堆填處理問題，最終堆填區只會不斷擴建，永無止境。焚化，令垃圾隨風而去，餘下灰燼循環成水泥，起高樓大廈，乃出路之一。

西瓜，即外綠內紅偽環保分子，其實唔想減廢，而係想港人減消費。但好慳嘅我，要強迫減消費，等同政治迫害，至於負擔得起嘅人，錢既唔係問題，結果西瓜政策只會令香港生活質素，貧富距離再拉闊，令更多社會棟樑憎人富貴。況且，要改變七百萬人生活習慣，無一、兩代人時間，又點可以成事？

唔堆填，唔焚化，最後一條出路，就係輸出垃圾。香港最貴係地，用香港土地處理垃圾，愚不可及。香港政府有的是錢，鄰近地區則大把地；買塊地，以港式管理，搞個至少用三、五十年嘅超級堆填區，擔保可見將來都唔需為垃圾煩惱，又可以促進人家經濟同技術。再者，要搞回收，都要收番嚟嘅物料循環再造，先算環保。香港無工業，減廢又自欺欺人；統一去鄰近地區集中處理垃圾，一舉三得。有理性嘅政策又唔去做，強迫港人就大條道理；黃錦星，如果垃圾唔送走，你亦唔好返來。

李兆富