爽報 (港聞 V08, 2013.06.25)

「香港人，記住，呢個世界，有信得過嘅男人，但係冇信得過嘅政府。」斯諾登離開香港嘅一刻，我部電話收到一個離奇短訊；反正都唔知邊個發，我就當係佢嘅臨別贈言。

話說回頭，上周我寫咗篇公開信畀私隱專員蔣任宏，當然，99.99%嘅讀者，都聽到弦外之音係乜。點都好，官方循例都有個回覆，話「國家行為」不受管轄。

政府對於商業機構收集資訊，管呢樣，又管嗰樣，但係對於政府侵犯市民私隱，就一句話機構唔管，就當無事發生過。香港政府有權竊聽監聽，又有權向銀行攞市民資料，各政府部門又有時會交換市民記錄，呢啲行為，點樣進行，有無必要進行，個人資料及私隱專員公署，又有無認真了解同公開？

香港個人資料及私隱專員公署，原則上係法定獨立機構。何謂獨立機構？即係佢有法定權力，去監察企業同政府。不過，觀乎私隱衙門，只係識得細眉細眼處，抽秤私人企業。真正有民主自由嘅地區，真正獨立又有心去保障市民私隱嘅機構，一定會對政府同私人企業一視同仁，唔會大細超。

人作為社會動物，就一定要放棄部份私隱，去換取少少方便。私隱法，原則係確保資訊交付過程，點用同點解，講得清清楚楚，而唔係執着免責聲明點寫，字體有幾大。香港技術官僚，真係立心捍衞資訊自由同私隱？可惜，發短訊嘅人，我搵唔番，否則我一定問佢點睇。

李兆富