爽報 (港聞 V14, 2013.07.09)

噚日講到，行政設計主導政府機器運作，政策擺位反映政治現實；意猶未盡，今日再畀多幾個例子。

曾幾何時，教育同人力統籌系出一門，教育擺明為市場經濟服務。後來，教育成為獨立王國，不斷壯大教育既得利益小圈子，最佳例子莫過於文憑量寬。至於勞工，從前係獨立系統，後來合併福利，結果打工變成老奉有得分，由工資工時談判立法開始，最終極政策目標，叫做全民退休種金。

福利，以前歸納入衞生。好耐之前，香港最主要慈善都係贈醫施藥，好似東華、仁濟、博愛甚至教會。後來政府將所有慈善收編，公共醫療同福利，本來就有一定淵源。當食物衞生獨立成為一個政策範疇，香港醫療衞生政策亦變成不斷增加業界利益同權力；講咗好耐嘅強制醫保金，大家可以自行思考係乜嘢一回事。

規劃環境地政，分拆出環境局。為咗證明自己存在價值，由停車熄匙到垃圾收費，環境局近年搞咗唔少政策。不過，當電力市場轉由經濟交到環保，千祈唔好以為無影響，事實上所有減排固定投資都轉嫁消費者，今年下半年環保局會有幾個大型公眾諮詢，由燃料組合、排放到電費；當經濟政策被西瓜騎劫，未來幾年大家講到電費都肯定會牙痛咁聲。

當然，更加唔可以唔提政制及內地事務局，呢個局做乜，大家心照。

李兆富