爽報 (港聞 V05, 2013.07.16)

公開考試，乃係中國人社會頭等大事；公開考試出現系統漏洞，肯定動搖呢個華人社會。頭版頭條，理所當然。特區衙門二話不說，將責任推卸落由補習社轉營嘅私校，亦屬意料之內。此等私校，本身形象急功近利不在話下。但有頭髮，邊個想做癩痢？可以讀國際學校、去外國讀大學，又何需爭崩頭博一鋪去重讀？吳克儉以制度犧牲者去掩飾制度問題，果真係政治偽術最高境界。

任何公開考試，都有方法去準備。如果學生能夠透過準備考試，學得一招半式有用技能，就算功德無量。新高中文憑試，官方竟然為咗令考試無譜可依，考生上考場如同上刑場，無論點樣準備，都覺得好似去賭一鋪運氣。上星期有電視台踢爆，新高中文憑試試題亂七八糟；語文閱讀理解題，無厘頭至極，甚至文章原作者，亦唔贊成出試題者觀點。考評局擺下如此烏龍，卻死不認錯。

以公平論，有高分低能，或高能低分，考試制度就已經唔合格。制度上，香港考試由設計到執行，既壟斷亦無透明度。為準備考試而出現嘅學店，只是制度崩壞的惡果，不是緣起。政府搞教改，越改越劣；教師、家長、學生甚至學校互相指責，偏偏官僚置身其外，道理何在？

李兆富