爽報 (港聞 V12, 2013.07.24)

道歉法例？乜嘢來架？話說，前日申訴專員公署講政府部門唔願意道歉，因為怕道歉會變成法律責任，所以，建議政府立法保障道歉者。最正係，律政司竟然話，認同有呢個需要，已經開始研究。

政治智慧呢味野，真係稀缺貨品。如果問香港人，邊個最需要道歉？思歪肯定入選三大。政府立法保障政府道歉嘅權益；成件事荒謬絕倫，但諗深一層，確實又反映到香港真正問題所在。

道歉如果唔係出於內心，不如唔好道歉。虛情假意講句：「對唔住囉！」又或者冷冰冰寫一行：「對閣下構成不便，我代表公司及同事致歉。」都係港式虛偽，對覺得受委屈嘅當事人，等同二次傷害。

「係咁意講句就算，冇人要負責㗎？」公義，對大多數人來講，就係好人有好報，惡人有惡報；有人做錯事，就要有人負責。

不過，就正如申訴專員所講，公務員就係怕有責任，所以先唔講對唔住，又或者要話代人地講對唔住（即係錯不在我），甚至加句「構成不便」（好小事啫）。

講到尾，公務員無論入職時有幾偉大理想，話要服務社稷，此時此刻，腦海中只會不斷重播：「我跟足規矩啦……打份工啫……忍一時，唔出聲……想點呀？」

做錯事，有歉意，正常人第一件事會諗，點樣去幫人家解決眼前問題，而唔係諗點樣自保。你睇下申訴專員同律政司，佢地個腦成日淨係諗乜嘢？

李兆富