蘋果日報．金手指 ／2019-04-15／孫柏文(獅子山學會董事)

孫柏文曾經喺本欄分享過話由上世紀中創立標普500指數，創指數股中到今日表現最好嗰隻，就係賣萬寶路嘅Altria。理由係政府越管，就越冇對手下越好賺。不過，到歷史嘅呢刻，煙仔真係出現強勁嘅對手。就係電子蒸氣煙，Vape。

作為一個冇醫學文憑嘅香港人，我面對一條難題。就係呢邊廂香港醫生、AO等大聲疾呼話有害要禁。那邊廂全球歷史最悠久反癌慈善組織Cancer Research UK話如電子蒸氣煙普及，會少好多人患肺癌。同埋英國醫管局NHS內部智庫不斷重申話不但只唔好禁，仲要建議英國公立醫喺啲戒煙貼旁賣蒸氣煙。（你自己去google吓）

難題係，信香港醫生定係英國醫生？作為典型香港人，我硬係信英國醫生啦。香港醫生更醫得，就唔使做到咁肉酸去反外面訓練嘅醫生啦。

剛過嘅週六，立法會就政府禁售蒸氣煙上，畀市民發言。我有去，亦有幾樣嘢令我好出奇。首先，我，自由市場塔利班、長毛，馬克思主義者、曾話過「每次聽到國歌，我都想嘔」，深黃到似港獨嘅張倩盈、同一個用普通話發言，開口第一句話「我們一向都是愛國愛黨的」商會代表，全部異口同聲大力反對政府呢個建議。

特首林鄭月娥話過想解除香港內部矛盾，我確實諗都未諗過有一日，政府居然能令右、左、黃、藍企喺同一邊。林鄭真係好勁！呢場係全香港人對啲會考三十很高分低能嘅AO同醫生之戰。即公民黨支持，當年考唔到30分，內心好自卑嘅民主黨都可能會。

第二，發言反對嘅全部係好真心、好激動去反。發言支持嘅，聽落似中學辯論咁。點知真係被本報爆出港大迫啲學生撐政府。
最後，點解香港人記住殖民時代，覺得特區政府好廢？答案係當年打白粉，大幅補貼美沙酮。今日打煙仔，就諗住禁蒸氣煙。