蘋果日報．金手指 ／2019-06-11／孫柏文(獅子山學會董事)

禮拜日反送中遊行人數，絕對超乎預期。當孫柏文驚我哋香港人作為全球最實際嘅民族，經過雨傘運動後，喺一個硬推法案嘅「西環指揮特區政府」世代下，唔會走出來。當然，有唔少二流分析話就算走出來都完全冇用。不過我哋香港人喺過去半年，整體上對國際形勢嘅玩法開始明，所以冇理嗰啲分析。

咁走出來有咩用？首先，全球傳媒都大字標題報道遊行。當然亦要解釋點解我哋走出來，最重要係花旗國共和黨上下最喜愛嘅傳媒，例如Fox News、華爾街日報、Drudge Report等都高度關注。

當加埋美帝對中央已紮晒馬，好快可能美帝會簡單一句話：「通過送中，就需要取消關係法。」不但肯定一國兩制之死，仲要實質幫你取消一國兩制嘅着數。而如果禮拜三罷市又有奇蹟，美帝更可能進一步會有標靶式嘅制裁行動，例如針對香港某啲金融機構或個別人士，到時，邊個喺西環決定推送中嘅嗰位仁兄，都應該要孭鑊，而政府亦到時會被勒令停推。

當然，我知，你知，大家知以上都係博博吓。不過我深信，當「泄露國家機密」嘅Assange坐咗喺英國監獄等緊被「送美」，澳洲政府呢年多次封查「泄露國家機密」嘅新聞機構，紐西蘭早排拉啲網上分享事件嘅人。唔出盡力打送中，你又走得去邊？天佑香港。