信報／2019-08-17／孫柏文(獅子山學會董事)

嘩！今劑我哋真係杰撻撻。孫柏文真係有好多年冇見過我哋咁高姿態成為世界焦點了。我作為一個Prima Donna，見我哋日日做啲西報頭條係咪有啲振奮？係。不過，去到呢一刻，都應該係時候諗吓點拆掂佢。

首先，各位勇武派，你哋啲行為確實有效。做，都係想俾人知我哋受夠。有如李嘉誠話，真係震耳欲聾。今次唔止林鄭震爆耳膜，連習總、侵侵都聽得好清楚。

老實，如果阿叔我唔係由理大對出紅隧巴士站行上紅磡鐵路站都喘氣的話，我都會跟住你哋去勇武。

不過，我有個建議。不如大家唞一唞。搞咗咁耐，大家應該都要回回氣。啲頭盔、豬咀、鐳射筆，可能都要補吓貨。我有個朋友，腳筋發炎，上周睇醫生時被醫生問：「點呀？呢排你忽然行多咗好多路呀？」

所以，我建議不如就作個小休，即時停晒所有活動。一於就把9月13日中秋節定為再起義之日。橫掂大陸咁care佢哋今年十一國慶，如果要搞到嗰日，確實驚大家唔夠氣。不過，如果有小休，然後谷落去嗰兩周，場面就會好唔同。

港人難忘「元朗黑夜」
Hashtag我都幫你哋諗埋，就係#中秋再起義。覺得唔夠跎地，可以用＃中秋再煲過。英文則#fullmoonrerevolt。可能喺休戰期會有奇蹟。冇，就TG代月餅，人人朱元璋！

當然，我唔係大台。大家都知大台得一個，就係林鄭，要佢吹雞先得。所以⋯⋯

特首女士，我哋以前都傾過偈。以前我哋啲政策分歧，呢刻擺低先。我知你而家受嘅壓力好大，傳被打到甩牙嘅北方代表畫咗好多紅線，令你想拆彈都綁手綁腳。起碼喺「雙彈」（催淚彈、汽油彈）仲橫飛嘅日子，乜都唔做得，又要必撐啲執勤警員。我唔知你點睇呢個小休嘅idea，如果你見到，我有以下建議。

老老實實，香港人係永遠唔會忘記「元朗黑夜」。

我明你要硬撐啲執勤警員，不過，嗰晚係掉轉， 啲警員冇執勤，技術上唔使盲撐。大家都知你呢刻冇得郁人，不過，你一定要攞元朗嗰個commander祭旗。

佢可能真係無辜，可能真係啲警員當晚調晒落西環。不過，當「雙彈」日日橫飛時，你都要叫佢捱吓義氣，做個show，等香港人嘅怨氣可以消除。你當然冇得炒佢，不過，你試吓宣布佢調職，例如睇萬宜、船灣？雖然我唔知夠唔夠作為休戰嘅吹雞，不過「守水塘」係一種羞辱，所以係一個開始。

當然，宣布當日又宣布埋開始大規模charge嗰晚啲「白衫」，就會事半功倍。

如果休戰成功，就唔該求求你快啲𠱁上面話「止暴制亂成功！」佢哋肯收貨，覺夠貨話「已擊退外國勢力！」搞掂14億護旗手時，就快手搵李國能搞獨立調查委員會。乜都查，連當時係邊個撳掣要立法會繞過法案委員會直接二讀都水落石出。如果唔係，中秋晚一定㩒唔住。

最後，各位香港人。我唔知林鄭月娥係咪真係吹雞，唔知吹雞後勇武會否休戰，更唔知政府會否把握停戰嘅機會。中共喺我哋心目中，一向都係「信佢一成、雙目失明」。不過，都等咗二十幾年，豪多幾個禮拜畀佢，可能有轉機呢？如果你識啲勇武，係佢哋嘅家人、朋友，勸一勸佢哋小休。亦答應佢，如果真小休後，政府都唔做，你就同佢一齊去勇武。起碼我會。