信報／2019-09-07／孫柏文 (獅子山學會董事)

獅子山學會上下，多年來全世界都結交咗好多朋友。呢排，當然有好多人私底下問過我哋究竟個來龍去脈係點。真係連我都收過有好幾個國家嘅現任及前議員嘅查問。

而因我哋個圈都係「諗嘢」派，深明冇錯，星星之火，可以燎原，不過更要明白嘅係點解個草原會有咁多易燃物品囤積呢？我自己都有啲非常反對示威者暴力嘅朋友，佢哋每次向我咆哮鬧爆時，我都會話：「你呢個反應，令我相信你係個見到啲鐵生銹時，會謾罵氧氣嘅人。」

我同好多外國智庫、政客朋友話，其實香港呢場運動，只係全球都見到Globalist對Populist戰爭中其中一個戰場。2016年英國脫歐、侵侵當選，都係個症狀，只係香港原本已有，揮發社會怨氣嘅機械，被DQ、反剪布、繞過「法案委員會」等廢咗功能，所以咪暴力囉。有如一條鐵嘅保護膜拆咗後，鐵銹出現般可預見。

斷錯症致愈醫愈出事
而呢個民意戰爭，最大問題係全球Globalist班建制，都出現診症錯誤，愈醫愈出事。

唔明？大家可以試吓以下嘅實驗。你走去捉個英國人，用港式英文口音問佢：「點解你哋2016年會投脫歐？」而佢答：「有好多人唔想有咁多新移民，同埋多年來貧富懸殊愈來愈嚴重，所以啲人不滿，攞歐盟來出氣囉。」呢個答案，相信問本欄隔離左右欄嘅作家們，都應該係會咁答。

而真係咁答嘅人，就係佢係個Clueless Globalist嘅鐵證。因做佢哋，首先要有嗰種令其他人極討厭，對他人嘅鄙視。因個答案基本上就係話支持脫歐嘅人，係個種族歧視、無能嘅窮人。

好啦，之前英揆文翠珊作為個Clueless Globalist留歐派人，咪就跟住咁診斷落藥。同歐盟傾脫歐協議時，諗住結束歐盟人自由出入英國就搞掂，繼續「為經濟」留喺英國要硬食歐盟指指點點嘅關稅區裏。結果係點？上次英國人全國投票時，保守黨得票百年來最低。斷錯症的自然後果啊。

拒換問題水最終失魚缸
英國人想脫歐，係因Globalist不斷話社會咩問題，都因要「國際合作」，不斷將制訂政策嘅權力輸送去啲遙遠、聽唔到民怨嘅地方。就算啲人話個魚缸啲水有問題，要你換，你都視若無睹。最後啲人連你個魚缸都換埋。

咁香港呢？同大家一樣，我哋獅子山學會都有睇特首林鄭月娥嘅短片。而一睇，我哋都知大鑊，啲氧氣會繼續鐵氧化嘅過程。原因係特首話大家見到的，係因後生仔女置業難喎；《環球時報》老總話係因啲蝸居貴喎；香港西報啲專欄寫手日日話係因貧富懸殊喎。

即係咩意思？即係當啲後生話「見不到未來」時，佢哋只係班無能窮人。你只要畀層樓佢，個個都會變成陳健波，乖乖等收成期。你話跟住咁落藥醫，會有咩後果？咪就係囉。

「積極不干預」才是真章
「見不到未來」其實係假。大家見到嘅未來，就係「一國兩制」，特別係真港人治港愈來愈貨不對辦。英國人班政治工程師為港設計嘅系統，背後就係深知冇民意授權下，政府唯一能持續擁威逼力專利Monopoly Power of Coercion，就係盡可能唔用佢。即係佢叫嘅「積極不干預」。

今時今日，係個中聯辦班連幾千蚊美元人均經濟體，都搞到增長大幅放慢嘅官員。去舞動個「做嘢交貨便是政績」，唔明系統設計原意嘅技術員政府。今轉證明北京真係唔夠班、唔夠料去run個有香港咁富庶嘅社會。

一部一級方程式嘅汽車引擎，落咗去班手多多，搞掂過拖拉機柴油引擎就好自滿嘅人手上。天佑香港。