蘋果日報．金手指／2020-01-07／孫柏文(獅子山學會董事)

孫柏文真係估唔到，繼6個月前「送中條例」被「壽終正寢」後，呢刻連數據都話「止暴制亂」壽終正寢埋。

點解？習大炒王志民後，搵咗駱惠寧中聯辦主任。咁佢第一日返工時，話見記者喺西環街頭食西北風好慘，所以就叫晒佢哋入去。咁駱主任企喺中聯辦lobby見啲記者，就講咗嘢。而從佢講話，我可以百分百肯定，「止暴制亂」壽終正寢。

點解？其他「分析員」，喺舊媒體或網上，例如YouTube，對於今次換人係咩意思都係估估吓。我作為財演，寫得喺財經版，當然就係以數據分析啦。

咩數據？當報新聞嗰啲，清一色都係講啲唔講啲駱主任講咗乜，我作為盡責嘅財演，當然去中聯辦個網站睇原稿啦。而當我一上，第一件事唔係睇佢講乜。而係好科學咁搜尋「止暴制亂」一詞嘅出現次數。

齋睇港共代表人，特首梁振英。當個message一定，就不斷重複。我嘅預期係「止暴制亂」出現嘅頻率，必達當年梁特讀施政報告時，「一帶一路」咁勁！

點知，駱主任一次都冇講過「止暴制亂」添！哎吔！咁都未止，佢完全捕捉到所有香港人，不論男女，都有嘅港女DNA。即係每個決定有三個影響因素。排第三，就係有冇着數。而冇着數唔緊要，因排第二嘅就係有冇feel。有feel時，冇着數都得。不過對港女最緊要嘅，就係有冇面。就算同條仔一齊有feel有着數都好，冇面嘅都係要分手獨立。

而駱主任好似時光倒流返去80年代初，光大主席幫「大富豪」開幕嗰隻，話：「香港同胞為國家改革開放和現代化建設作出了重要貢獻！」而唔係話：「我告訴你們香港人，沒有我們你水也沒得喝！」

中共真係勁，想180度飄移，就真係飄移。今次呢盤show hand，我哋香港人揸住一對8（金融中心地位）晒冷叫開牌。點知中央真係二仔底。所以最後，嗰啲諗住喺年宵賣啲印咗「止暴制亂」T恤嘅朋友，快啲割價求售啦。因好快唔值錢了。