蘋果日報．金手指／2020-05-12／孫柏文(獅子山學會董事)

「石油？上個月見咗底啦！仲唔大手撈？你識啲咩呀，仲話係前石油分析員。」呢句話，孫柏文聽唔少。隔幾日，就同一班人話：「好彩冇聽你講，你睇吓石油彈咗幾多！」

大家當然諗緊以上嘅說話，係我喺呢幾日聽到的。冇錯，上週確實係聽到呢啲說話，不過，同樣喺四月初我都係常聽到呢啲說法。嗰陣，5月交收嘅WTIC油價，啱啱跌到落廿蚊，跌穿「平均成本價」，又撞正油組話減產喎，所以油價大彈。之後發生乜事，唔使我再提啦。

咁今次6月交收嗰啲油點呢？紐約買賣嘅期油，係喺美國內陸中部做交收，冇得出口。百分百賭美國內部供求。需求就躂咗落來，未見有反彈，而供應則真係開始有油田閂喉。唔知6月交收合約落實嗰日，會否又再出現啲冇存倉能力嘅人，要不問價（負數？）沽出。

買石油，不過又冇接實貨能力嘅人，會是誰呢？更重要嘅係，仲有幾多呢啲人呢？之前啲石油ETF持有人，都係呢啲人。不過當啲ETF全部唔敢再掂6月交收嘅油時，唔通6月呢期先最冇異動？

石油，其實只係其中一個例子。今次全球經濟需求L型咁跌，各行各業，產能一日唔大幅減低，一日都冇運行。而當央行一日都印銀紙，托住啲債仔，邊到會有人將公司清盤，令產能下降？所以當股市仆直後，股神巴菲特喺佢旗艦巴郡嘅第一季業績報告中，講到明仲不斷減持其他公司股份，乜都唔買，你已知咩事。