am730 (大明燈 M38, 2011.6.13)

上星期五，都幾恐慌，因為真係冇諗過政府會出招。早、午、晚，包晒你三餐。

首先朝早，兩撇鬚話林局長會出第二季土地勾地表，中午就收到傳媒朋友話，樓價指數會破百的消息，個心一諗，不如去盡啲，出埋收緊按揭招數，點知真係開口中，下午四點半，排定隊等睇戲。

金管局總裁陳德霖講嘢預咗會冇驚喜，打壓唔到樓市急速上升的勢頭之餘，親自敲碎香港作為「自由市場」的金漆招牌。不過，最離譜的，係陳總仲累埋班中產。人哋「掹掹緊」先夠俾首期，想上車，你一槌打落嚟，咩好夢都碎晒。簽咗臨時買賣合約嗰批，有可能銀行提供的按揭成數不足，隨時要撻訂。

有部分打算細屋搬大屋的，最後又可能搬唔成。做啲嘢，限制非本地買家入市，係贏到部分市民、議員的掌聲，但長遠會造成惡性循環，到底佢知唔知？

你限人，人限你。依家最怕咩？我最怕中央或者地方政府，倒轉槍頭，唔俾香港人在內地買樓。到時，香港人又少咗個投資機會。喺香港，唔少百萬富翁都係靠買樓投資成小康，呢個係連嗰啲80後中嘅廢青、蝗蟲都知。

千禧年嗰期，識打入內地樓市，又賺到盤滿砵滿嘅，大有人在。當時，香港人有冇諗過炒貴晒人哋啲樓，好唔安樂呢？依家成日擔心內地樓市泡沫，香港人咪就做咗半個兇手。

你睇下九龍倉(004)、恒隆地產(101)咁積極打入內地市場為乜？就係為咗隻金蛋囉。依家內地人來香港買樓，因為匯率關係、打個八三折，咁抵，炒到樓價飛天，我哋就撒賴，針對佢哋，香港最大嘅問題就係好住，攞美國簽證都快啲。

依家搞到個最高按揭成數要下調最少一成。按揭證券公司又唔准佢哋申請按揭保險。但講真，內地真係大把有錢人，都唔自在，一成、兩成定三成啦？ 

只不過見我哋香港啲息口咁平，就借多少少，留番啲現金做其他投資。你要佢哋俾晒幾百萬，甚至幾千萬現金，我諗都仲係綽綽有餘。

深信，呢個措施最終都係唔收效。內地人會好似掃手袋、手錶咁，愈掃愈興奮。到時頭痕的，始終都係香港人。

香港人，大把特權。六四燭光晚會、衝擊立法會，咩都參與得。內地人呢，講多幾句就會俾人又拉又鎖。大家身份、地位咁唔同，唔好話，香港人嫌內地人文化低，內地人都睇我哋唔順眼。大家都係中華人民共和國兒女，點解待遇差咁遠。

有機會，你做初一，我做十五，一於限制香港人北上投資，買樓咩，唔俾！做生意咩，行遠啲，沒錯，咁會限制咗經濟活動，但至少做到溫總首要目標，控制通脹，哈哈哈………