蘋果日報 (利字當頭 B12, 2011.6.20)

父親節，酒樓樓面比平常擠逼，不情願地聽到周圍幾枱茶客的對話。

有一位自稱是曾特首結拜大佬的茶客說：「呢個結拜細佬，京官一句話，佢連老竇姓乜都唔記得。一國兩制玩完！王光亞星期二叫你起居屋，星期六就出招。以後香港唔使做政策啦，北京話乜就乜啦！要立法會做乜吖？以後香港人條氣唔順咪同北京講囉。」

另一個茶客，比較心平氣和：「公屋富戶，都想做業主。你唔知香港貧富懸殊咩？政客幫呢班人上順風車，好合理喎。

保蝗黨先至係香港第一大黨啊！o依家大學生個個都申請公屋，為乜啊？綠表啊。班八、九十後，識得攞呢的着數，直頭十個叻。中國特色嘅社會，就係要識攝位打尖！你睇吓海洋公園同迪士尼啲排隊嘅自由行，佢哋就係識攝位打尖，所以先至係十幾億當中富起來嗰一班！香港下一代，終於有競爭力嘞！有朝一日，香港人攝位打尖叻過上海人，我哋就可以做中國最具競爭力城市。」

呷一口普洱，我忽然間發覺，平曰，帶小朋友到主題公園玩，見到打尖攝位，永遠都只有我一個人出聲。過去幾日，又好似只得我一個不滿王光亞河水倒灌井水。算了，連自稱民主派都抽王光亞的水，要特區政府復建居屋。港人治港，是一個失敗的實驗，因為懂珍惜香港價值的人實在太少，貪便宜的人太多。

利世民

http://hkliberty.wordpress.com