am730 (大明燈 M42, 2011.6.29)

對上幾個星期，好多人都期望有兩件事發生，而呢兩件事嘅出現又咁啱同內地有關。

第一件就當然係個市快啲反彈，唔好再無止境咁跌落去，喺上個星期五嗰日，因為國家總理溫家寶喺前宗主國報刊《金融時報》寫篇文章，宣布勝利打低通脹，所以歌舞昇平咗一日，過咗個禮拜之後，又打回原形，個市冇乜力再升，孫柏文有朋友已經打定輸數，走咗去開沽空戶口，諗住以後等渾水(MuddyWaters)出報告，就搭順風跳樓機沽沽佢喎。

另一個就係一眾飯民同廢青期待已久嘅居屋，經國務院港澳辦主任金口一開，即刻有「政府消息」話要起，一眾平日開口埋口港人治港嘅飯民即刻支持取消一國兩制，中央官講乜就乜，然後就開始鬥叫起幾多，由最少嘅5,000伙去到三萬幾伙都有，睇怕過多個禮拜，好快就到「八萬五」呢個「目標價」，然後梁振英第一個出來認佢當年係始作俑者。

孫柏文不嬲都反對復建居屋，因為會鎖死買家資本，令佢哋好難藉投資或創業等繼續向上流動，而今日支持復建居屋嘅人，到樓市下跌時一定會第一個話「八萬五無恥」。

仲有樣令孫柏文擔心就係，點解班飯民，特別係班大狀，內地高官講一句佢哋想聽嘅說話，佢哋就即刻冧哂，唔理一國兩制，唔理港人治港，唔怪得近排政府都慣咗打橫來，因為班站喺道德珠穆朗瑪峰嘅飯民根本冇尊重過制度。

講真，香港回歸祖國咁多年，阿爺亦都已經大國崛起，一啲所謂政府消息竟然話，解決樓市方法竟然係拎返殖民統治時代政策，咁咪即係丟阿爺嘅架？既然偉大祖國咁關心香港人買唔買到樓，咁呢筆數就梗係祖國付鈔，講真，做孫仔嘅，又點敢同阿爺爭找數喎！點俾？只需要阿爺一聲令下，下令幾間內房股，來香港勾地投地，跟正規矩去買地起樓，咁做絕對唔會損害一國兩制，只係當內資來港投資，同時庫房又有收入。

然後阿爺就提供市價七折俾某啲香港人買，至於詳細條款係點，邊啲人先合乎資格做受助人民，仲有係咪繼續用攪珠方法去做，就自己決定嘞。

話唔定阿爺到時計掂條數，唔使學美國佬咁搞次按，都可以用市價一折賣樓，連一啲不務正業、成日去超市搗亂嘅廢青都買得起樓，到時所有中國人終於可以抬起頭講番句：英國人做不到的事，中國人終於做得到了。