am730 (大明燈 M33, 2011.8.31)

金融海嘯幾時真正開始，歷史學家一定有排爭拗。有啲可能會話係貝爾斯登(Bear Stearns)被摩根大通(細摩，JP Morgan)拯救之時，有啲可能係話由07年8月初開始，債券市場停頓運作，連債市交易員都將佢哋啲Bloomberg Monitor，轉去睇股票之際。孫柏文就會話係07年初，匯豐控股(005)發盈利警告嘅時候喇。

其實，呢次金融海嘯喺07年8月時，我都曾經喺我個blog度講過，如果要結束，第一件要發生嘅事就係所有人，包括銀行、政府都要計清計楚自己啲資產，以及收入流有幾多。要保守到全世界都覺得，「呀，可信嘞」。

點解？因為佢哋欠人嘅錢就好清楚，所以當有埋令人信服資產及收入流計算後，就可以計到究竟全球個氹有幾大，之後就可以諗由邊個填。

喺自由市場下，咪就係做錯決定嘅一班人。買咗貴樓，供唔起嘅負資產：即銀主。放貸俾佢咗金融機構，收咗銀主單位後就拍賣咗佢，跟住如果回籠錢少過按揭，便只好硬食。

好，如果輸得好「甘」，間銀行要被接管嘅，先輸股東，之後借嘅錢俾銀行嘅人，即是存戶都會輸。呢啲甚至唔係咩高深嘅理論，只係司棋姐瞪大隻眼話；「呢啲係規矩！」

依家個問題係個個官員、銀行家，都話等一陣就冇事！冇人快速地一齊計啲一些會令人信服嘅數，又點會完。試諗吓，差啲爆煲嘅美國銀行，如果一早做啲唔騙自己嘅數，喺07年資金自由行時放晒啲建設銀行(939)，依家就唔使咁慘。

另外，歐洲，話冇計，ok去到呢個位真係冇計，不過愛爾蘭喺08年如果冇為銀行全面包底，國民來一次大短痛，政府跟當時法例，有上限式咁向小存戶賠款，即冰島嗰隻，依家肯定乜都跌完。

真真正正要市民有管理資產風險，風險要全面分散，就係要佢哋知道揀錯任何存放錢嘅地方，要輸。多唔好講，08年本港就有一間銀行傳擠提，政府即時話為所有銀行包底，依家香港人會唔會將好幾個50萬元存款放喺幾間銀行嘅戶口？

好，到有時，真係要爆，無將啲錢分散嘅人，又會上街，要求「監管不力」特區政府賠錢？喺呢方面，歷代咁多個特首，做得最好嘅就係董建華，我真係唔想人身攻擊，只係真心嘅為下一個金融危機擔心。