am730 (大明燈 M34, 2011.10.10)

上周一，孫柏文被問：[其實啲西人係咪個個有問題，點解個個唔儲錢，由政府到個人都負債纍纍呢？] 我話唔係D N A出錯，係因政策下出現嘅理性抉擇。箇中原因，就要講歷史。我講過二戰結束後，西方世界啲領導人開始檢討二戰嘅成因。希望得出理由同教訓後，唔好似當年對上嘅五十年，再爆戰爭。喺經濟上，佢哋得出結論係商品、產品嘅貿易要自由，一旦爆封關鎖國嘅保護主義，各國永遠都存在嘅好戰鷹派就會上台，最終就係戰爭。倘保護冇競爭力嘅行業，就不如俾佢哋自生自滅，因後果太嚴重。呢個上星期一已同大家講過。

除咗自由貿易外，另一教訓就係貨幣政策上唔可以亂來。特別係唔可以攞貨幣政策玩權宜之計。如二十年代尾，德國為唔減公務員開支、政府使費等，就大印特印馬克，最終爆超級通脹，德國人民儲蓄化為烏有，經濟因價格信號失效而停頓，民不聊生。最後因德國人民被主流政黨推動嘅通脹玩死，所以就俾希特拉喺有民意基礎之下上台。

所以喺二戰後，西方世界就決定將所有貨幣同美元掛鈎，而美國政府就向其他政府保證，倘換取美元，就可以用32美元作價換一安士黃金。

不過當貨幣係穩定，甚至排除所有政治壓力地穩定，政府就好多嘢唔可以做。或者做咗之後要面對後果。如開支上唔可以亂來，呢樣已經對政客來講非常難做。睇香港就知，由工聯會、職工盟，到自由黨、功能組別，個個都係要政府政策傾斜、利益輸送俾自己嘅支持者。有盈餘使盈餘，冇嘅就借，到借唔到就港元脫鈎繼續使。有通脹？咪睇吓邊個上街最大聲，或打小報告最精警。

從另一角度睇，當貨幣價值不能自主，就要面對後果。最好嘅例子必定係現今嘅希臘，佢哋鍾意使凸，當冇人再肯借錢俾佢哋時，就要硬食減開支。你估吓陳婉嫻、李卓人、田北俊等今日係希臘總理又會點？

最弊係美國到了60年代遇到嬰兒潮玩社運嘅高峰期時，就出現福利開支大幅飆升嘅情況。再遇上共產主義喺越南要抗衡，軍事上又要使，所以法國政府開始美元換黃金。雖然應該係減開支嘅警號，點知喺1972年，美國政府就寧願脫鈎，都要繼續使。因為脫鈎，貨幣將不斷貶值，利息唔會跑贏通脹，所以啲人就不理性地借，有咁多借咁多。當利息被供求及生產力主導，即資本做投資，並被央行人為咁扭曲，資本、資金就會亂走。特別去到資產市場，形成一次又一次嘅資產泡沫。最弊係收入低嘅一班，無法借錢參與，令貧富懸殊更劇烈。仲要因為貨幣唔再以黃金做錨，亦揭開用國債作為儲備，特別係各國國債做儲備嘅中心。更加令想使嘅政客更易集資，繼續使錢買選票。呢個就係現今各國政府面對嘅死結，所以話睇到沮喪，你會怪我嗎？