am730 (大明燈 M34, 2011.10.24)

孫柏文最近識咗個八十後W，讀緊大學，又係典型牛市先開始炒股，一開波買乜贏乜，覺得巴菲特都冇自己咁勁。

好啦，今年個市咁差，W輸到趴喺度，見呢排多咗人玩牛熊證，想跟著炒，W學咗少少，知道牛熊證等於買大細，就索性瞇埋眼收市買一邊，博第二日裂口高開或低開就走人，點知就輸埋大學畢業後諗住搬出來住嘅租金，基本上之前贏嘅已經嘔突，W問孫柏文點算好。「你炒咗咁耐先輸，都學到唔少嘢，咪當交學費囉！好過你拎啲錢去讀埋啲量化寬鬆咗嘅金融碩士課程吖。」我安慰佢。「我想要私人空間，好需要錢搬出來住。再炒牛熊證得唔得呢？」W問我。

「你已經輸成咁，再炒咪連本都冇埋！對上嘅金融海嘯前後，又係好似依家咁，牛熊證佔成交額超過一成，最近仲誇張，有幾日佔約兩成，又係另一個大跌市訊號！不如儲啲錢遲啲執平貨，俾少少耐性啦！」我答W。

W都仲係覺得等唔切，臨走話：「好彩施政報告有話起青年宿舍，申請唔切公屋都叫有個水泡，有多啲私人空間，第日如果有女朋友，仲可以去宿舍一聚，同大學住宿舍冇分別。」

孫柏文聽到「廢青宿舍」呢個idea嘅時候，已經覺得呢個係全份報告入面最睇唔起後生仔嘅政策。

表面上就話因為年輕人要有私人空間，所以政府就要起啲床位俾佢哋，潛台詞就係批死依家啲後生仔太廢，根本冇可能用自己能力爭取想要嘅嘢，不如政府用納稅人嘅錢施捨俾佢哋。唔知當日特首曾蔭權加呢一項上去施政報告嘅時候，心入面有冇睇唔起呢班廢青呢？

呢項政策最差嘅地方就係判俾非政府組織做，因為交俾呢班貪得無厭嘅社運演員經營，佢嘅只會向入住青年灌輸「新廢青主義」，有乜都攤大手板向社會拎，總之千錯萬錯都係社會嘅錯，自己就啱哂，成為特區成立以來最大嘅廢青基地，咁班社運演員就唔止可以收?，仲可以增加「受助人」數目，瘋狂向政府要更多資源。

既然錢點都係立亂使，孫柏文覺得呢項政策應該修改，應該將宿舍判俾懲教署，選址沙頭角，或東平洲等不食人間煙火地區，同時亦都有好嚴舍規，例如晚上9點落閘放狗、10點熄燈、每朝6點就要起身、一間房至少有10張碌架床、唔俾帶異性入宿舍等，等啲為咗要「平價私人空間」嘅廢青明白到，要求政府用低價，甚至免費提供服務俾你哋時，代價就係你身為成人嘅尊嚴！