爽報 (財經V28,2012.1.10)

「有人話，通過左競爭法，就可以保障中小企，唔畀大超市減價賣豬肉。但係，消費者又好希望可以買到平豬肉抗通脹，究竟，競爭法係左消費者，定係中小企？」尋日朝早，我做電台節目個陣，天真地問商務及經濟發展局既高官。

「依家立法既競爭法裡面，有明文規定第二行為守則……即係話，如果有企業，濫用支配性市場勢力，令到衝擊對手。重點係，要證明企業有一起市場勢力。所以，中小企係唔需要擔心。」官員說。

我問：「咁第一行為守則又係乜？」

官員答：「第一行為守則，簡單講，即係企業串連起來，協議減少競爭。」

我問：「呢一類規管係唔係不論個別企業規模大少？ 同埋，第一行為守則，包唔包括行業組織自己關埋門傾唔加價？」

官員答：「無錯，企業無論大少都唔應該串連起來協議減少競爭，而且，行業組織都一樣受規管。」

啊，大家試想，如果競爭法通過之後，究竟係大企業頭痕，定係中小企頭痛？

其實，超級市場減價，對消費者來講，點都係好事。

「如果超市趕絕街市豬肉檔，然後再加價又點算？」有好多人都信，呢個世界真係有略奪性定價。不過，自從2006年我參與公開辯論競爭法，至今仍然未聽過有任何一個人可以攞出一個具體案例，證明有企業可以用略奪性定價之後肆無忌憚加價。我講過，如果有人可以攞出一個案例咁大把，我呢世都唔再講競爭法。

點解我可以咁有把握？因為過去一百年，大多數產品，扣除通脹之後，從來都只有越來越平。略奪性定價，好似武俠小說一樣，講就天下無敵。

「自從舊年11月豬肉來貨價下跌，點解兩間超市可以減價，但街市豬肉檔又唔減？」真正好學既你，應該問呢個問題。

之前我都講過，超市係透過製造大額現金流，然後透過財技賺錢，又再用呢一筆額外收入，壓低零售價，令現金流更大。如果我無記錯，好似東尼蔡都講過，和黃，即係百佳阿媽，本年報係世界最難睇得通個本。細心諗，和黃旗下，好多都係大現金流業務，絕對唔係出於偶然。

至於豬肉檔點解唔減，我畀個貼士，然後大家估下啦：好多豬肉檔，其中一個重要收入，係收貨畀區內酒樓茶餐廳。

利世民