爽報 (財經V29, 2012.2.1)

支持派錢理由一：「呢個政府咁大花筒，派晒啲錢，咪可以阻止呢個政府亂來囉！」

毫無疑問，呢個政治上嘅「焦土政策」，聽落真係好有道理，非常吸引。

回歸後，香港出現過連年財赤。當年特府出盡九牛二虎之力，搞個資源增值計劃（EPP），想用三年時間去慳3%經常性開支，公務員都牙痛咁聲，仲要去到第二年之後，唔再講，亦無人跟進。之後，特府又走去聽班會計佬講搞銷售稅諮詢。

老實講，假如今日將特府儲備派到剩低唔夠12個月使用，恐怕只要出現財赤，呢個填鴨式教育嘅政府，定會提出要開乜稅物稅。再加上香港已瀰漫一股依賴情緒，經濟不景時，特府只要用「窮人好慘」四隻字做理由，就好容易就牽動政客去一齊支持加稅。

政府做所謂財富再分配，永遠最先攞錢嘅，都係識走後門入庫房嗰班既得利益份子。依賴公帑救濟嘅人，只不過係利益輸送嘅遮醜布。

我都好想根治呢個問題，但要明白，庫房水浸並非大花筒或系統性利益輸送嘅原因。要阻止政府亂來，首先要畀公眾明白，政府嘅本質並非仁愛關懷，政治亦只不過係利益掛帥，所以，最終都係要有更多人相信，要好好生活，總要靠自己。

事事依賴政府須反思

打個比喻：猛獸係一隻靠集體意志生存嘅猛獸。要對付呢隻猛獸，最緊要係唔再畀飽飯佢食。順服猛獸，過程將會好漫長。派錢掏空庫房呢一招，就等於將隻猛獸放血，只會惹來猛獸反噬。呢個係我反對派錢嘅第一個原因。

支持派錢理由二：「好多無交稅嘅人都有貢獻，派錢，佢哋就可以共享成果。」

有貢獻嘅人，好應該得到回報。不過，無理由要三九唔識七嘅納稅人幫手埋單。你有貢獻，自然有人直接得益；請你先向呢一班有直接得益嘅人，提出要求共享成果。

老實講，絕大多數人支持派錢，理由並非上面講嘅「焦土政策」，而係「幫補吓啦」。對唔住，政府唔係黃大仙。如果越來越多人認為，面對任何問題，都可以叫政府出手解決，淨係呢一個現象，已經值得反省。

利世民

專欄電郵：SharpHK.Simon＠gmail.com

Facebook專頁：www.facebook.com/AppleSimon