爽報 (財經V32, 2012.4.5)

當溫家寶話國有銀行搵錢太易，我心諗：「我哋係咪要買番幾手建行（939）、工行（1398）同中行（3988）投機吓？」「傻咗呀？你仲走去買？係咪Too Simple呀？」

就當我Too Simple。搵錢易有乜唔好？讀書時，教授講到中國四大政策銀行，亦即係建、工、農同中行，話明佢哋扮演好計劃經濟使命，換言之搵錢就唔使諗啦。

當年呢四大政策銀行嘅BalanceSheets，充斥不良資產。2003年中國為整靚銀行盤數，注資450億美元。之後先將佢哋上市。一來接受市場監察；二來以後等銀使，唔使問阿公攞，出面大把股東幫你手。宏觀睇，將四大行及其他國有金融機構上市，係九十年代後國企改革延續。

好耐之前，大陸仍係教科書式嘅計劃經濟，淨係得農業、工業、建設同埋周邊經濟活動，全部有相關國企包辦，為國企提供資金，自然係四大政策行。結果國企同政策銀行不但成為國家財政負擔，更係信貸擴張嘅元兇。信貸擴張造成惡性通脹，帶來社會不安，最終變成近代中國一次大悲劇。九十年代改革重點，順理成章要國企面對市場現實。當時，國企最大功能，唔係生產，而係提供就業及一條龍福利。所以國企改革嘅政治壓力之大，今時今日好難想像，尤其工人下崗，係非常棘手嘅社會問題。

其實三十幾年改革開放，講到底係管治權宜，並非自由市場意識形態。北京最深層次願望係可掌權到永遠，呢個中國人政治DNA，幾千年來如是。國有銀行地位絕對唔會降。相反，我解讀係要銀監同人行，開路畀四大向中小企放水。有錢賺嘅生意邊個唔想做？如果唔係上面頂住，國有銀行又點會唔借錢畀中小企？既然溫總開到聲，四大仲唔乘機？溫總自己又可卸任前做好人。家家有求，呢啲咪政治囉。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon