蘋果日報 (財經要聞B11, 2012.5.03)

 

早幾日，有幸同前輩曾淵滄博士同左丁山叔叔食飯，聽咗好多故仔同分析，令我獲益良多。聽曾博士話，新加坡其實個個揸車，我聽到第一刻唔係好信，因為佢哋加埋稅時，新車價比香港仲貴。曾博士解釋，原來新加坡好多車位，棟棟大廈都起好多，所以泊車成本平，圍番條數個個養車，仲要去兩個街口都會揸車。最尾呢個我明點解，因為記得新加坡國父李光耀被問乜嘢係人類最偉大發明時，佢老人家話係冷氣，所以相信佢好體恤咁驚你行一個街口都成吉思汗打仔，所以先畀大家好多坐冷氣車嘅機會。我聽完，又諗香港依家興叫梁振英學佢地，我第時泊車會平D。

 

 

領匯長升長有似蘋果

不過左丁山叔叔就話呢個好難，因為政府聽D壓力團體話，唔可以發水，搞到啲新盤冇車位，我咁既夢想就幻滅。

不過講到車位供應，就要講吓呢排長升長有嘅領匯（823），升勢有D似花旗國嗰隻蘋果（AAPL）。大家如果睇股價走勢圖，就會發覺佢係28元個位徘徊左好耐，之後喺3月29日開始長升長有，大家知唔知個日發生咗乜事？冇錯，就係因為我用隻金手指篤咗呢隻畀大家買，係個篇題為「一注獨贏梁振英連任」既文裏面，唯一一隻我開名話會受惠嘅股票就係佢。

當然，你可能話領匯年結係3月，對上幾年都有炒業績嘅走勢，仲要有如星體運行般有規律咁每年升一次，每次升個幾月，升幅百分之十，就算有D乜乜危機，都係最後一隻跌，第一隻升番。

大家可能會話：「除非有危機，如果唔係一年郁一次，好悶呀！仲有，就算有危機，都係快落快上，佢係市場中最後跌個隻，即係如果買左其他野，變咗做大閘蟹，邊有錢買呀？」問得好。呢隻股份就係因為有以上既特質，所以好啱一類人買，大家會估邊類人？

相信好多人都會估係退休人士。呢個估法唔係錯得晒，不過我覺得更岩買領匯嘅人係個D諗住好乖，月供股票當儲錢嘅朋友。當隻股既波幅細，每月買到幾多股就容易D掌握。因為佢每個租務周期，都不斷令租戶搵多D，所以就可以加租，收入就會上升。佢成為月供股嘅吸引力，我發覺漸漸開始取代月供股王滙控（005）嘅地位。無他嘅，好難想像領匯管理層忽然叫供股，一口氣問你拿番幾年來派過俾你既股息。所以畀我揀，要月供股票就一定供領匯。

 

買私人商場成新亮點

仲有，佢地開始買私人商場都係個亮點。一，買D近佢地原有嘅商場，就可將D商場定位，無需要千篇一律，可多元化。呢個Point大家都知，更緊要係當領匯係有機會畀「Fing晒先安樂」既候任特首梁振英「國有化」，每件資產買入來，都會有溢價，買得越多就越多屈機機會。

最後，我相信領匯平均租金，仲有D未完全發揮舖位既租戶係度，所以仲有追番合理租金嘅空間。要提一提大家，有個好容易嘅方法就知仲有冇追番合理租金嘅空間，就係個班社運演員同廢青一日仲示威，即等於仲有D未完全發揮舖位既租戶係度，佢地唔再示威，就等於領匯已成功追番晒合理租金既空間。不過，到時先算囉。

 

孫柏文

作者為獨立股評人
本欄逢周二、四刊出